(ព្យុងយ៉ាង)៖ ក្រសួងការបរទេសកូរ៉េខាងជើង កាលពីថ្ងៃព្រហស្បតិ៍ ទី២៤ ខែកញ្ញា ឆ្នាំ២០២៦ បានប្រកាសមិនទទួលយកដាច់ខាត ចំពោះសេចក្តីថ្លែងការណ៍អន្តរជាតិមួយ ដែលអំពាវនាវឱ្យប្រទេសនេះបញ្ឈប់ការធ្វើតេស្តអាវុធនុយក្លេអ៊ែរ ដោយអ្នកនាំពាក្យក្រសួង បានហៅការអំពាវនាវនេះថា «ជាការបង្កហេតុនយោបាយដ៏ធ្ងន់ធ្ងរប្រឆាំងនឹងរដ្ឋរបស់យើង» ពីសំណាក់ «កម្លាំងអរិភាព»។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កិច្ចប្រជុំរដ្ឋមន្ត្រីនៃក្រុមប្រទេសជាមិត្ត នៃសន្ធិសញ្ញាហាមឃាត់ការធ្វើតេស្តនុយក្លេអ៊ែរគ្រប់ជ្រុងជ្រោយ (CTBT) ដែលរួមមានអូស្ត្រាលី កាណាដា ហ្វាំងឡង់ អាល្លឺម៉ង់ ជប៉ុន និងហូឡង់ បាននិយាយថា ការធ្វើតេស្តនុយក្លេអ៊ែរថ្មីណាមួយរបស់កូរ៉េខាងជើង នឹងត្រូវចាត់ទុកជាទង្វើគ្មានការទទួលខុសត្រូវ និងមិនអាចទទួលយកបាន។ កិច្ចប្រជុំដែលប្រព្រឹត្តទៅនៅទីក្រុងញូវយ៉ក កាលពីថ្ងៃអង្គារ បានអំពាវនាវឱ្យទីក្រុងព្យុងយ៉ាងអនុវត្តយ៉ាងពេញលេញ តាមសេចក្តីសម្រេចពាក់ព័ន្ធទាំងអស់របស់ក្រុមប្រឹក្សាសន្តិសុខអង្គការសហប្រជាជាតិ។

ក្នុងសេចក្តីថ្លែងការណ៍មួយ ចុះផ្សាយដោយទីភ្នាក់ងារព័ត៌មានរដ្ឋកូរ៉េខាងជើង KCNA អ្នកនាំពាក្យក្រសួងការបរទេសកូរ៉េខាងជើង បានពិពណ៌នាប្រទេសរបស់ខ្លួនថា ជា «រដ្ឋមានអាវុធនុយក្លេអ៊ែរ ប្រកបដោយការទទួលខុសត្រូវ»។ រីឯក្នុងសេចក្តីថ្លែងការណ៍មួយទៀត ដែល KCNA បានចុះផ្សាយកាលពីថ្ងៃដដែល រដ្ឋមន្ត្រីការបរទេសកូរ៉េខាងជើង លោកស្រី Choe Son Hui ក៏បាននិយាយដែរថា ឋានៈជាប្រទេសមានអាវុធនុយក្លេអ៊ែររបស់កូរ៉េខាងជើង គឺមិនអាចត្រឡប់ថយក្រោយវិញជាដាច់ខាត។

លោកស្រី Choe បានឆ្លើយតបបែបនោះ ចំពោះកិច្ចប្រជុំមួយផ្សេងទៀត ដែលធ្វើឡើងនៅក្រៅមហាសន្និបាតអង្គការសហប្រជាជាតិ ក្នុងសប្តាហ៍នេះ រវាងសហរដ្ឋអាមេរិក កូរ៉េខាងត្បូង និងជប៉ុន ដែលប្រទេសទាំងបីបានបញ្ជាក់ជាថ្មី ពីការប្តេជ្ញាចិត្តរបស់ពួកគេ ចំពោះការរំសាយអាវុធនុយក្លេអ៊ែរទាំងស្រុងពីកូរ៉េខាងជើង។

គួរបញ្ជាក់ថា សន្ធិសញ្ញាហាមឃាត់ការធ្វើតេស្តនុយក្លេអ៊ែរ CTBT ដែលត្រូវបានព្រមព្រៀងដោយអន្តរជាតិ កាលពីឆ្នាំ១៩៩៦ បានហាមឃាត់ «ការបំផ្ទុះសាកល្បងអាវុធនុយក្លេអ៊ែរ ឬការបំផ្ទុះនុយក្លេអ៊ែរបែបផ្សេងៗទៀត» នៅគ្រប់ទីកន្លែងក្នុងពិភពលោក ដោយមានគោលដៅកាត់បន្ថយ ហើយទីបំផុតលុបបំបាត់អាវុធនុយក្លេអ៊ែរទាំងស្រុង៕