នេប៉ាល់៖ ថវិកាសរុបចាំបាច់សម្រាប់ជួសជុលកសាងឡើងវិញ ក្រោយមហន្តរាយទឹកជំនន់ នឹងឡើងដល់ ៤,៧៨ពាន់លានដុល្លារ
12-09-2026 15:25
(កដ្ឋមណ្ឌូ)៖ ក្រសួងការបរទេសនៃប្រទេសនេប៉ាល់ បានឲ្យដឹងកាលពីថ្ងៃសុក្រ ទី១១ ខែកញ្ញា ឆ្នាំ២០២៦ ថាការចំណាយសរុបដើម្បីជួសជុលស្ដារប្រទេសឡើងវិញ បន្ទាប់ពីគ្រោះមហន្តរាយទឹកជំនន់ដ៏សាហាវ ដែលបង្កឡើងដោយការបាក់ផ្ទាំងទឹកកកពីលើភ្នំ កាលពីខែមុន នឹងមានចំនួនរហូតដល់ខ្ទង់ ៤,៧៨ពាន់លានដុល្លារ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
លោក Lok Bahadur Chhetri អ្នកនាំពាក្យក្រសួងការបរទេសនេប៉ាល់ បានប្រាប់អ្នកសារព័ត៌មានថា «តម្រូវការប៉ាន់ស្មានសរុបសម្រាប់ការកសាងឡើងវិញគឺប្រហែល ៤,៧៨ ពាន់លានដុល្លារ»។ លោកបន្តថា «ក្នុងចំណោមនេះ ប្រហែល ៥៧,៦៧លានដុល្លារ ត្រូវបានវាយតម្លៃថា ត្រូវការសម្រាប់ការងារស្ដារ និងជួសជុលឡើងវិញរយៈពេលខ្លី ក្នុងរយៈពេល៦ខែខាងមុខ ខណៈប្រហែល ៤,៧១ពាន់លានដុល្លារ គឺត្រូវការសម្រាប់កិច្ចប្រឹងប្រែងរយៈពេលវែង»។
មេដឹកនាំនេប៉ាល់ បាននិយាយថា ប្រទេសតំបន់ជួរភ្នំហិម៉ាឡៃមួយនេះ ត្រូវការការគាំទ្ររយៈពេលវែងពីអន្តរជាតិ ដើម្បីសម្របខ្លួនទៅនឹងបរិស្ថានភ្នំដែលកំពុងផ្លាស់ប្ដូរយ៉ាងឆាប់រហ័ស។ លោកនាយករដ្ឋមន្ត្រី Balendra Shah បាននិយាយកាលពីពេលកន្លងមកនេះថា នេប៉ាល់ត្រូវតែលើកឡើងឱ្យខ្លាំង ជាមួយសហគមន៍អន្តរជាតិ អំពីគ្រោះមហន្តរាយដែលខ្លួនបានជួបប្រទះ ដោយសារការប្រែប្រួលអាកាសធាតុ។ លោក Shah ត្រូវបានគេរំពឹងថា នឹងធ្វើដំណើរទៅក្រៅប្រទេសលើកដំបូងក្នុងនាមជាមេដឹកនាំ ដើម្បីថ្លែងទៅកាន់មហាសន្និបាតអង្គការសហប្រជាជាតិ អំពីបញ្ហាបន្ទាន់នេះ ក្នុងខែកញ្ញានេះ។
នេប៉ាល់ ដែលជាប្រទេសមួយភាគច្រើនជាទីជនបទ និងមានប្រជាជនសរុប ៣០លាននាក់ រួមចំណែកមួយផ្នែកតូចប៉ុណ្ណោះ នៃការបំភាយឧស្ម័នផ្ទះកញ្ចក់សកលបើធៀបទៅនឹងបណ្តាប្រទេសឧស្សាហកម្ម។ ខណៈមូលហេតុពិតប្រាកដនៃការបាក់ផ្ទាំងទឹកកក គឺមិនទាន់ច្បាស់ក៏ដោយ ការប្រែប្រួលអាកាសធាតុកំពុងបណ្ដាលឲ្យផ្ទាំងទឹកកករលាយនៅទូទាំងពិភពលោក ជាហេតុបង្កើនហានិភ័យនៃគ្រោះមហន្តរាយបែបនេះ។ អ្នកវិទ្យាសាស្ត្រនិយាយថា ផ្ទាំងទឹកកកនៅតំបន់ហិម៉ាឡៃ ដែលជាជួរភ្នំខ្ពស់បំផុតរបស់ពិភពលោក កំពុងរលាយលឿនជាងមុន ស្របពេលសីតុណ្ហភាពសកលកើនឡើង។
លំហូរទឹកលាយឡំជាមួយ ល្បាប់ភក់ និងកម្ទេចកម្ទី ប្រៀបដូចរលកយក្សស៊ូណាមិ កាលពីថ្ងៃទី ២៦ ខែសីហា ដែលបានចាប់ផ្ដើមនៅព្រំដែនចិន-នេប៉ាល់ បានសម្លាប់មនុស្សជាង ១៤០០ នាក់ និងបណ្តាលឱ្យបាត់ខ្លួនប្រហែល ៥៦០០ នាក់ មកទល់នឹងពេលនេះ។ ការវាយតម្លៃបឋមរបស់អង្គការសហប្រជាជាតិ បានប៉ាន់ស្មាន ការខូចខាតចំពោះសំណង់អគារពីទឹកជំនន់នៅនេប៉ាល់តែឯង គឺមានចំនួន ១៥៨លានដុល្លារ ហើយបានព្រមានថា ការខាតបង់សរុប ដែលរួមទាំងការខូចខាតផ្លូវថ្នល់ និងស្ពាន ដីកសិកម្ម និងការចំណាយមនុស្សធម៌ គឺនឹងខ្ពស់ជាងនេះឆ្ងាយ។
គួរបញ្ជាក់ថា អ្នកជួយសង្គ្រោះនៅនេប៉ាល់ បានរកឃើញសាកសព ១៣៨៥ នាក់ ខណៈមនុស្សប្រហែល ៥១៣០ នាក់នៅតែបាត់ខ្លួន គិតត្រឹមថ្ងៃសុក្រសប្តាហ៍នេះ។ រីឯនៅប្រទេសចិន បើយោងតាមប្រព័ន្ធផ្សព្វផ្សាយរដ្ឋ ចំនួនអ្នកស្លាប់មាន៤៣នាក់ និង៥១៩នាក់បាត់ខ្លួន។ សរុបជារួមវិញ តួលេខចុងក្រោយបំផុត នៃអ្នកដែលបានបាត់បង់ជីវិតក្នុងប្រទេសទាំងពីរ គឺ១៤២៨នាក់ និងជាង៥៦៤៩នាក់ទៀតបាត់បង់ខ្លួន រួមទាំងជនបរទេសប្រហែល ៨០០ នាក់ ក្នុងនោះមានភ្ញៀវទេសចរ និងអ្នកធ្វើធម្មយាត្រាសាសនា៕
