(ម៉ានីល)៖ រដ្ឋអាជ្ញានៅប្រទេសហ្វីលីពីន នាថ្ងៃចន្ទ ទី៧ ខែកញ្ញា ឆ្នាំ២០២៦ បានធ្វើការចោទប្រកាន់ព្រហ្មទណ្ឌ ប្រឆាំងនឹងសមាជិកសភាមួយរូប ដែលត្រូវជាបងប្អូនជីដូនមួយរបស់ប្រធានាធិបតី លោក Ferdinand Marcos ជុំវិញការជាប់ពាក់ព័ន្ធក្នុងរឿងអាស្រូវពុករលួយទ្រង់ទ្រាយធំ ដែលទាក់ទងនឹងគម្រោងគ្រប់គ្រងទឹកជំនន់ក្លែងក្លាយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការចោទប្រកាន់ជាផ្លូវការខាងលើនេះ គឺជាង១ឆ្នាំបន្ទាប់ពីអំឡុងសុន្ទរកថាជាសាធារណៈមួយ លោក Marcos បានលើកឡើងជាប្រធានបទក្តៅ ពាក់ព័ន្ធគម្រោងហេដ្ឋារចនាសម្ព័ន្ធខ្មោច ស្តីពីការគ្រប់គ្រងទឹកជំនន់ ដែលគេជឿថា បានធ្វើឱ្យប្រជាជនហ្វីលីពីនដែលខិតខំបង់ពន្ធ ខាតបង់ប្រាក់រាប់ពាន់លានដុល្លារ។ ម្ចាស់ក្រុមហ៊ុនសំណង់ មន្ត្រីរដ្ឋាភិបាល និងអ្នកនយោបាយជាច្រើននាក់ ត្រូវបានចោទពីបទកិបកេងថវិកាពីគម្រោងទាំងនោះ។

នាថ្ងៃចន្ទនេះ មន្រ្តីដឹកនាំការស៉ើបអង្កេត លោក Jesus Crispin Remulla បាននិយាយថា សំណុំរឿងប្រឆាំងនឹងលោក Martin Romualdez ដែលជាបងប្អូនជីដូនមួយរបស់លោកប្រធានាធិបតីហ្វីលីពីន ពាក់ព័ន្ធនឹងទឹកប្រាក់សរុប ៧,៤ ពាន់លានប៉េសូ ឬស្មើនឹងប្រហែល ១១៧,៩លានដុល្លារ។ លោក Romualdez ធ្លាប់បានបដិសេធម្តងហើយម្តងទៀតថា លោកមិនបានប្រព្រឹត្តខុសអ្វីនោះទេ។ តាមរយៈការចោទប្រកាន់ខាងលើ រូបលោកអាចប្រឈមការផ្តន្ទាទោសដាក់ពន្ធនាគារ អស់មួយជីវិត។

បើតាមលោក Remulla ក្រុមរដ្ឋអាជ្ញាមានបំណងចោទប្រកាន់បទល្មើសបន្ថែមទៀតប្រឆាំងលោក Romualdez និងអ្នកផ្សេងទៀតដែលជាប់ពាក់ព័ន្ធ ក្នុងរឿងអាស្រូវគម្រោងគ្រប់គ្រងទឹកជំនន់នេះ។ សហចុងចម្លើយដទៃទៀត ក្នុងសំណុំរឿងលោក Romualdez រួមមានអតីតសមាជិកសភាលោក Elizaldy Co និងអ្នកមួយចំនួនផ្សេងទៀត ដែលត្រូវបានចោទប្រកាន់ពីបទសមគំនិតបង្កើនទ្រព្យសម្បត្តិដោយខុសច្បាប់ តាមរយៈការកិបកេងថវិការដ្ឋ។

កាលពីខែកញ្ញា ឆ្នាំ២០២៥ លោក Romualdez បានលាលែងពីតំណែងជាប្រធានសភាតំណាងរាស្រ្តហ្វីលីពីន បន្ទាប់ពីឈ្មោះរបស់លោក បានលេចឡើងក្នុងការស៊ើបអង្កេត ដែលរីកកាន់តែធំ។ នៅពេលនោះ លោកបានអះអាងថា ការលាលែងពីតំណែង នឹងអនុញ្ញាតឱ្យអ្នកស៊ើបអង្កេតបំពេញការងាររបស់ពួកគេ ដោយមិនស្ថិតក្រោមឥទ្ធិពលមិនសមស្រប។ ក្រោយលាលែង លោកនៅបន្តមានឋានៈជាសមាជិកសភា។

គួរបញ្ជាក់ថា ក្នុងរយៈពេលមួយឆ្នាំកន្លងមកនេះ ក្រុមរដ្ឋអាជ្ញាហ្វីលីពីន បានធ្វើការចោទប្រកាន់ប្រឆាំងអតីតសមាជិកសភា ក៏ដូចជាសមាជិកបច្ចុប្បន្ន ព្រមទាំងមន្ត្រីវិស័យសាធារណការ និងតំណាងក្រុមហ៊ុនសំណង់ជាច្រើនរូប ដែលត្រូវបានចោទប្រកាន់ថា មានជាប់ពាក់ព័ន្ធជាមួយផែនការពុករលួយដ៏ធំសម្បើមនេះ៕