បទវិភាគ៖ កិច្ចសហប្រតិបត្តិការចិន-កៀហ្ស៊ីស៊ីស្ថានបើកទំព័រថ្មី
01-09-2026 18:02
(ប៉េកាំង)៖ "ដំណើរទស្សនកិច្ចផ្លូវរដ្ឋរបស់លោក Xi Jinping ប្រធានរដ្ឋចិនលើកនេះមានសារសំខាន់ណាស់" "បានបើកទំព័រថ្មីនៃកិច្ចសហប្រតិបត្តិការចិន-កៀហ្ស៊ីស៊ីស្ថាន" "ចង្អុលបង្ហាញពីទិសដៅថ្មីសម្រាប់ការអភិវឌ្ឍនៃទំនាក់ទំនងទ្វេភាគី"...សម្រាប់ដំណើរទស្សនកិច្ចផ្លូវរដ្ឋរបស់លោក Xi Jinping ប្រធានរដ្ឋចិនលើកនេះ មជ្ឈដ្ឋាននានារបស់កៀហ្ស៊ីស៊ីស្ថានបានវាយតម្លៃខ្ពស់។ នាព្រឹកថ្ងៃទី៣១ខែសីហា តាមម៉ោងក្នុងតំបន់ ប្រមុខរដ្ឋនៃប្រទេសទាំងពីរបានជួបពិភាក្សាការងារនៅក្រុង Bishkek រដ្ឋធានីកៀហ្ស៊ីស៊ីស្ថាន ។ លោក Xi Jinping ប្រធានរដ្ឋចិនបានថ្លែងថា ភាគីចិនរីករាយពួតដៃគ្នាជាមួយភាគីកៀហ្ស៊ីស៊ីស្ថាន ដើម្បីជំរុញការកសាងសហគមន៍ជោគវាសនារួមចិន-កៀហ្ស៊ីស៊ីស្ថានឱ្យមានភាពកាន់តែស៊ីជម្រៅនិងកាន់តែរឹងមាំ។
នេះគឺជាលើកទី៣ហើយដែលលោក Xi Jinping ប្រធានរដ្ឋចិនបំពេញទស្សនកិច្ចផ្លូវរដ្ឋនៅកៀហ្ស៊ីស៊ីស្ថាន ។ ភាគីកៀហ្ស៊ីស៊ីស្ថាន បានទទួលស្វាគមន៍ភ្ញៀវកិត្តិយសបំផុតដោយកម្រិតខ្ពស់។ ក្នុងអំឡុងពេលដំណើរទស្សនកិច្ច ប្រមុខរដ្ឋនៃប្រទេសទាំងពីរបានរួមគ្នាចុះហត្ថលេខាលើ «សេចក្តីប្រកាសរួមរវាងសាធារណរដ្ឋប្រជាមានិតចិន និងសាធារណរដ្ឋកៀហ្ស៊ីស៊ីស្ថានស្តីពីការអភិវឌ្ឍទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ ក្នុងយុគសម័យថ្មីប្រកបដោយគុណភាពខ្ពស់»និង«សន្ធិសញ្ញាស្តីពីភាពជាអ្នកជិតខាងល្អ និងកិច្ចសហប្រតិបត្តិការមិត្តភាពរវាងសាធារណរដ្ឋប្រជាមានិតចិន និងសាធារណរដ្ឋកៀហ្ស៊ីស៊ីស្ថាន»។ ក្រៅពីនេះ ភាគីទាំងពីរក៏បានចុះហត្ថលេខាលើ ឯកសារសហប្រតិបត្តិការជាង២០ច្បាប់ក្នុងវិស័យវិទ្យាសាស្ត្រនិងបច្ចេកវិទ្យា ការអប់រំ ការផ្លាស់ប្តូររវាងប្រជាជននិងប្រជាជន និងប្រព័ន្ធសារព័ត៌មានជាដើម ។
ក្នុងនាមជាអ្នកជិតខាងល្អដែលពឹងផ្អែកគ្នាទៅវិញទៅមក ដៃគូល្អដែលមានជោគវាស
នារួមគ្នានិងមិត្តភក្តិល្អដែលជួយគ្នា ទៅវិញទៅមក ទំនាក់ទំនងរវាងចិននិងកៀហ្ស៊ីស៊ីស្ថានមានប្រវត្តិសាស្ត្រដ៏យូរលង់ ។ ក្នុងរយៈពេល៣៤ឆ្នាំបន្ទាប់ពីការបង្កើតទំនាក់ទំនងការទូតមក ទំនាក់ទំនងចិន-កៀហ្ស៊ីស៊ីស្ថានបានឆ្លងកាត់ការសាកល្បងនៃបម្រែបម្រួលនយោបាយអន្តរជាតិ ហើយរក្សាបាននូវការអភិវឌ្ឍប្រកបដោយ ភាពល្អបរិសុទ្ធនិងស្ថិរភាពជាប់រហូតមក ដែលសម្រេចបាននូវការលោតផ្លោះជាប្រវត្តិសាស្ត្រពីភាពសុខដុមរមនា និងចំណងមេត្រីភាពដល់ភាពជាដៃគូយុទ្ធសាស្ត្រ រហូតដល់ភាពជាដៃគូយុទ្ធសាស្ត្រគ្រប់ជ្រុងជ្រោយក្នុងយុគសម័យថ្មី ។
ទំនុកចិត្តកម្រិតខ្ពស់ខាងនយោបាយ និងការគាំទ្រគ្នាទៅវិញទៅមកយ៉ាងមុតមាំ គឺជាការធានាដ៏សំខាន់ ។ ក្នុងអំឡុងពេលដំណើរទស្សនកិច្ចលើកនេះ លោក Xi Jinping ប្រធានរដ្ឋចិនបានគូសបញ្ជាក់ថា ភាគីចិនរីករាយបន្តគាំទ្រគ្នាទៅវិញទៅមកយ៉ាងមុតមាំជាមួយភាគីកៀហ្ស៊ីស៊ីស្ថានអំពីបញ្ហា ដែលពាក់ព័ន្ធដល់ផលប្រយោជន៍ស្នូលរៀងខ្លួន។ ភាគីកៀហ្ស៊ីស៊ីស្ថានបានគូសបញ្ជាក់ថា ជានិច្ចកាល "ចិនតែងតែជាទិសដៅអាទិភាពចម្បង ក្នុងគោលនយោបាយការទូតរបស់កៀហ្ស៊ីស៊ីស្ថាន ហើយក៏ជាមិត្តភក្តិដ៏ជិតស្និទ្ធបំផុតនិងជាដៃគូដែលគួរឱ្យជឿទុកចិត្តបំផុត របស់ភាគីកៀហ្ស៊ីស៊ីស្ថាន"។
កិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមក គឺជាកម្លាំងចលករដ៏សំខាន់សម្រាប់ជំរុញការកសាងសហគមន៍ជោគវាសនារួមចិន-កៀហ្ស៊ីស៊ីស្ថាន ឱ្យមានភាពកាន់តែស៊ីជម្រៅនិងកាន់តែរឹងមាំ ។ កៀហ្ស៊ីស៊ីស្ថានជាប្រទេសដំបូងគេបង្អស់ដែលគាំទ្រនិងចូលរួមគំនិតផ្តួចផ្តើមស្តីពីការរួមគ្នាកសាង "ខ្សែក្រវាត់និងផ្លូវ" ។ ចិនបានក្លាយជាដៃគូពាណិជ្ជកម្មធំជាងគេនិងជាប្រភពវិនិយោគបរទេសធំជាងគេរបស់កៀហ្ស៊ីស៊ីស្ថាន ក្នុងរយៈពេលច្រើនឆ្នាំជាប់ៗគ្នា ។ នៅឆ្នាំ ២០២៥ ទំហំពាណិជ្ជកម្មចិន-កៀហ្ស៊ីស៊ីស្ថានបានឡើងដល់២៧,២ ពាន់លានដុល្លារអាមេរិក ដែលកើនឡើងប្រហែល២០ភាគរយ បើប្រៀបធៀបនឹងរយៈពេលដូចគ្នានាឆ្នាំមុន ។
ទំនាក់ទំនងរវាងប្រទេសនិងប្រទេស គឺឈរលើមូលដ្ឋាននៃការរាប់អានគ្នារវាងប្រជាជននិងប្រជាជន។ ប៉ុន្មានឆ្នាំចុងក្រោយនេះ ពីការបង្កើតរោងជាង Luban និងវិទ្យាស្ថានខុងជីរបស់ចិននៅកៀហ្ស៊ីស៊ីស្ថាន រហូតដល់ការរៀបចំទិវាវប្បធម៌ មហោស្រពភាពយន្ត មហោស្រពសិល្បៈ ក៏ដូចជាការពួតដៃគ្នាអភិរក្សនិងបន្តវេនបេតិកភណ្ឌវប្បធម៌អរូបីពិភពលោកដូចជា Manas ជាដើម មូលដ្ឋានគ្រឹះនៃការរឹតចំណងមេត្រីភាពឱ្យបន្តគ្រប់ជំនាន់រវាងចិន-កៀហ្ស៊ីស៊ីស្ថានមានភាពកាន់តែរឹងមាំ ។
អ្នកជិតខាងតែងតែសង្ឃឹមថា អ្នកជិតខាងរបស់ខ្លួននឹងមានសុភមង្គលនិងទទួលការអភិវឌ្ឍកាន់តែល្អ ។ ទំព័រថ្មីនៃកិច្ចសហប្រតិបត្តិការចិន-កៀហ្ស៊ីស៊ីស្ថានក្នុងយុគសម័យថ្មីបានឆ្លុះបញ្ចាំងពីចំណងមិត្តភាពផ្លូវសូត្រដែលមានរយៈពេលជាង១ពាន់ឆ្នាំ ។ ចិននិងកៀហ្ស៊ីស៊ីស្ថានប្រាកដជានឹងបង្កើតសមិទ្ធផលនៃកិច្ចសហប្រតិបត្តិការជាក់ស្តែងកាន់តែច្រើនដែលអាចមើលឃើញនិងស្ទាបបាន ដើម្បីត្រួសត្រាយស្ថានការណ៍ថ្មី នៃការអភិវឌ្ឍទំនាក់ទំនងចិន-កៀហ្ស៊ីស៊ីស្ថានប្រកបដោយគុណភាពខ្ពស់ ផ្តល់ផលប្រយោជន៍កាន់តែច្រើន ដល់ប្រជាជននៃប្រទេសទាំងពីរ ក៏ដូចជារួមចំណែកកាន់តែធំដល់សន្តិភាព ស្ថិរភាពនិងវិបុលភាពក្នុងតំបន់និងពិភពលោក៕
វិទ្យុមិត្តភាពកម្ពុជាចិន
