សហរដ្ឋអាមេរិក កំណត់រយៈពេលស្នាក់នៅ សម្រាប់និស្សិត និងអ្នកកាសែតបរទេស (Video inside)
17-07-2026 16:13
(វ៉ាស៉ីនតោន)៖ កាលពីថ្ងៃព្រហស្បតិ៍សប្តាហ៍នេះ រដ្ឋបាលប្រធានាធិបតីអាមេរិក ដូណាល់ ត្រាំ បានសម្រេចចុងក្រោយលើច្បាប់មួយចំនួន ដែលដាក់កម្រិតយ៉ាងតឹងរ៉ឹងលើរយៈពេល ដែលនិស្សិត និងអ្នកសារព័ត៌មានបរទេស អាចស្នាក់នៅក្នុងសហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសុក្រ ទី១៧ ខែកក្កដា ឆ្នាំ២០២៦។
ក្រោមការផ្លាស់ប្តូរមួយ ដែលអាចអនុវត្តឆាប់បំផុតនៅខែកញ្ញាខាងមុខ ជនបរទេសមានទិដ្ឋាការសិស្ស នឹងត្រូវអនុញ្ញាតឱ្យចូលរៀន សម្រាប់រយៈពេលនៃកម្មវិធីសិក្សា រហូតដល់អតិបរមា ៤ឆ្នាំ។ រីឯអ្នកសារព័ត៌មានបរទេស ត្រូវបានកំណត់ឱ្យស្នាក់នៅត្រឹមតែ ២៤០ថ្ងៃ ឬប្រហែល ៨ខែប៉ុណ្ណោះ ទោះជាពួកគេអាចដាក់ពាក្យស្នើសុំបន្តរយៈពេល ២៤០ថ្ងៃក៏ដោយ។ ដោយឡែក អ្នកសារព័ត៌មានចិន ទទួលបានត្រឹមតែ ៩០ថ្ងៃប៉ុណ្ណោះ។
នេះជាវិធានការថ្មីទៀត ដើម្បីការធ្វើអន្តោប្រវេសន៍ស្របច្បាប់ នៅក្នុងសហរដ្ឋអាមេរិក។ វាគឺជាផ្នែកមួយ នៃការបង្ក្រាបអន្តោប្រវេសន៍ដ៏ទូលំទូលាយ ដែលលោក ត្រាំ បានដាក់ចេញ ដោយគ្របដណ្តប់លើប្រតិបត្តិការអនុវត្តច្បាប់ នៅតាមទីក្រុងធំៗ ក៏ដូចជាការរឹតបន្តឹងថ្មីលើការផ្តល់សញ្ជាតិ៕
