(ព័រម៉ូរេសប៊ី)៖ កាលពីថ្ងៃព្រហស្បតិ៍ ទី១៦ ខែកក្កដា ឆ្នាំ២០២៦ រដ្ឋមន្រ្តីការបរទេសនៃប្រទេសប៉ាពូអាស៉ីនូវែលហ្គីណេ (PNG) បាននិយាយថា រដ្ឋាភិបាលរបស់លោកបានសម្រេចចិត្ត នឹងបិទការិយាល័យតំណាងរបស់តៃវ៉ាន់នៅក្នុងប្រទេសនេះភ្លាមៗ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

តំបន់ប៉ាស៉ីហ្វិក យូរមកហើយគឺជាតំបន់សម្រាប់ការប្រកួតប្រជែងការទូតរវាងចិននិងតៃវ៉ាន់។ រដ្ឋមន្រ្តីការបរទេស PNG លោក Justin Tkatchenko បានប្រកាសដូចខាងលើតាមរយៈទំព័រ Facebook របស់លោក។ លោក Tkatchenko ថារូបលោកបានប្រាប់ពីការសម្រេចចិត្តនេះ ទៅកាន់ឯកអគ្គរដ្ឋទូតចិនលោក Yang Xiaoguang ក្នុងសប្តាហ៍នេះ ហើយថា PNG ចាត់ទុកវា ជាការបោះជំហានដ៏សំខាន់មួយ ឆ្ពោះទៅរកការលើកកម្ពស់ទំនាក់ទំនងបន្ថែមទៀត។

ក្រសួងការបរទេសតៃវ៉ាន់ បាននិយាយថា ការសម្រេចចិត្តខាងលើ មិនត្រូវបានពិភាក្សាគ្នាជាមុនឡើយ ហើយខ្លួននឹងជជែកអំពី​រឿងនេះជាមួយរដ្ឋាភិបាល PNG។ ដោយឡែក ក្រសួងការបរទេសចិនវិញ បាននិយាយថា រដ្ឋាភិបាលទីក្រុងប៉េកាំង វាយតម្លៃខ្ពស់​ចំពោះការសម្រេចចិត្តរបស់ PNG ព្រោះវាជាការសម្រេចចិត្តត្រឹមត្រូវមួយ ហើយវានឹងជួយ​ពង្រឹងមូលដ្ឋានគ្រឹះនៃការអភិវឌ្ឍទំនាក់ទំនងទ្វេភាគីរវាងចិននិង PNG។

គួរបញ្ជាក់ថា តៃវ៉ាន់មានទំនាក់ទំនងការទូតផ្លូវការតែជាមួយប្រទេសដែនកោះតំបន់ប៉ាស៉ីហ្វិក ៣ប៉ុណ្ណោះ នោះគឺ Palau, Tuvalu និង Marshall Islands ប៉ុន្តែបានរក្សាស្ថានទូតក្រៅផ្លូវការ នៅប៉ាពូអាស៉ីនូវែលហ្គីណេ ហើយក៏មានការិយាល័យស្រដៀងគ្នានៅហ្វ៊ីជីផងដែរ។ សុរបលើពិភពលោក មានប្រទេសត្រឹម១២ប៉ុណ្ណោះ ដែលនៅមានចំណងការទូតផ្លូវការជាមួយកោះតៃវ៉ាន់៕