(អូតាវ៉ា)៖ លោកនាយករដ្ឋមន្រ្តី Mark Carney បាននិយាយថា កាណាដានឹងមិនចែកប្រាក់ចំណូលពីការបង់ថ្លៃសេវាឆ្លងកាត់ស្ពានថ្មី ដែលសង់ឡើងអស់ ៤,៧ពាន់លានដុល្លារ ជាមួយសហរដ្ឋអាមេរិកឡើយ រហូតទាល់តែកាណាដា ប្រមូលបានថវិកាវិនិយោគដំបូងគ្រប់មកវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៧​ ខែកក្កដា ឆ្នាំ២០២៦។

ស្ពាន Gordie Howe តភ្ជាប់ទីក្រុង Windsor រដ្ឋ Ontario ប្រទេសកាណាដា និងទីក្រុង Detroit រដ្ឋ Michigan សហរដ្ឋអាមេរិក ត្រូវបានពន្យារពេលដាក់ឱ្យប្រើប្រាស់ ​ដោយសារតែបញ្ហាពាក់ព័ន្ធការចំណាយរបស់​កាណាដា​ ​លើ​ថ្លៃសាងសង់។ សប្តាហ៍មុន លោកប្រធានាធិបតី ដូណាល់ ត្រាំ និយាយថា មានកិច្ចព្រមព្រៀងកាន់តែប្រសើរ សម្រាប់សហរដ្ឋអាមេរិក ដើម្បីបើកដំណើរការស្ពាន ដែលគ្រោងធ្វើឡើងនាថ្ងៃទី២៧ ខែកក្កដា។

ប៉ុន្តែនៅក្នុងសន្និសីទសារព័ត៌មាន កាលពីថ្ងៃព្រហស្បតិ៍ លោក Carney បាននិយាយថា កិច្ចព្រមព្រៀងមូលដ្ឋានជាមួយរដ្ឋ Michigan ទាក់ទងនឹងស្ពាន Gordie Howe នៅតែមិនផ្លាស់ប្តូរពីឆ្នាំ២០១២។ តាមកិច្ចព្រមព្រៀងនោះ កាណាដាមានសិទ្ធិប្រមូលប្រាក់ចំណេញពីការបង់ថ្លៃសេវាឆ្លងកាត់ស្ពាន រហូតដល់ខ្លូនទទួលបានមកវិញនូវថវិកាសាងសង់ស្ពាន។

គួរបញ្ជាក់ថា ការសាងសង់ស្ពាននេះ បាន​បង្កើន​ភាព​តានតឹង និង​នាំឱ្យ​មាន​ការចំណាយ​ច្រើន​ ​ទាំងនៅ​ក្នុងសហរដ្ឋអាមេរិក និង​កាណាដា ស្របពេល​​ប្រទេសជិតខាង​ទាំងពីរ​ កំពុងព្យាយាមដោះស្រាយ​កិច្ចព្រមព្រៀង​ពាណិជ្ជកម្ម​ ដែលត្រូវ​បាន​ធ្វើ​បច្ចុប្បន្នភាព៕