(អង់ការ៉ា)៖ នាថ្ងៃពុធ ទី៨ ខែកក្កដា ឆ្នាំ២០២៦ ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា កិច្ចព្រមព្រៀងឈប់បាញ់ជាមួយអ៉ីរ៉ង់​ គឺបានឈានដល់ទីបញ្ចប់ហើយ បន្ទាប់ពីទីក្រុងវ៉ាស៉ីនតោន បានបើកការវាយប្រហារថ្មីលើអ៉ីរ៉ង់ ក្រោយមានករណីវាយប្រហារលើកប៉ាល់ដឹកប្រេងក្នុងច្រកសមុទ្រ Hormuz ហើយអ៉ីរ៉ង់បានឆ្លើយតបវិញ ដោយកំណត់គោលដៅលើ​មូលដ្ឋានទ័ពអាមេរិក នៅតាមប្រទេសអារ៉ាប់ក្នុងតំបន់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ថ្លែងចេញពីរដ្ឋធានីអង់ការ៉ានៃប្រទេសតួកគីយ៉េ មុនការបើកកិច្ចប្រជុំកំពូលរបស់អង្គការ NATO លោក ត្រាំ បាននិយាយថា អនុស្សរណៈយោគយល់ដែលត្រូវបានចុះហត្ថលេខា ជាមួយអ៉ីរ៉ង់កាលពីខែមិថុនា ដើម្បីឆ្ពោះទៅរកកិច្ចព្រមព្រៀងសន្តិភាពផ្លូវការចុងក្រោយមួយនោះ គឺបានឈានដល់ទីបញ្ចប់ហើយ ហើយលោកមិនចង់ធ្វើប្រាស្រ័យទាក់ទងជាមួយទីក្រុងតេហេរ៉ង់ទៀតទេ។

លោកប្រធានាធិបតីអាមេរិក បានលើកឡើងយ៉ាងដូច្នេះថា «បើតាមការយល់ឃើញរបស់ខ្ញុំផ្ទាល់ គឺវាចប់ហើយ។ វាជារឿងចំណាយពេល​ឥតប្រយោជន៍ ក្នុងការទៅនិយាយជាមួយពួកគេ»។ លោក ត្រាំ បានឆ្លើយបែបនេះ នៅពេលត្រូវបានសាកសួរថា តើបទឈប់បាញ់ជាមួយអ៉ីរ៉ង់ នាពេលនេះគឺចប់ហើយមែនទេ។

គួរបញ្ជាក់ថា កាលពីថ្ងៃអង្គារ យោធាអាមេរិកបានប្រកាសពីការបើកប្រតិបត្តិការការវាយប្រហារលើគោលដៅអ៉ីរ៉ង់ ឆ្លើយតបការវាយប្រហារ​លើកប៉ាល់ពាណិជ្ជកម្មចំនួន៣គ្រឿង នៅច្រកសមុទ្រ Hormuz ក្នុងសប្តាហ៍នេះ។ ចំណែកនៅថ្ងៃពុធនេះ កងឆ្មាំបដិវត្តន៍អ៉ីរ៉ង់ បានប្រកាសថា​ ពួកគេបានបើកការវាយប្រហារលើទីតាំងយោធាសំខាន់ៗរបស់អាមេរិក នៅក្នុងប្រទេសបារ៉ែននិងកូវ៉ែត។ ភាគីទាំងពីរបានចោទគ្នាទៅវិញទៅមក អំពីការបំពានបទឈប់បាញ់។

កាលពីខែមិថុនា អាមេរិកនិងអ៉ីរ៉ង់ បានចុះហត្ថលេខាលើ​អនុស្សរណៈយោគយល់គ្នា ដែលបម្រើជាកិច្ចព្រមព្រៀងបឋម សម្រាប់ឆ្ពោះទៅរកការបិទបញ្ចប់សង្រ្គាមជាអចិន្រ្តៃយ៍ បន្ទាប់ពីវា​ផ្ទុះឡើងកាលពីថ្ងៃទី២៨ ខែកុម្ភៈ នៅពេលសហរដ្ឋអាមេរិកនិងអ៉ីស្រាអែល បានរួមដៃគ្នាបើកការវាយប្រហារតាមផ្លូវអាកាស នៅទូទាំងប្រទេសអ៉ីរ៉ង់៕