(ប៊ូនីយ៉ា)៖ អគ្គនាយកអង្គការសុខភាពពិភពលោក (WHO) លោក ថេដ្រូស (Tedros Adhanom Ghebreyesus) នៅថ្ងៃអាទិត្យ បានប្រកាសពីការជាសះស្បើយរបស់អ្នកជំងឺ អេបូឡាប្រភេទកម្រចំនួន ៥នាក់ ក្នុងអំឡុងពេលដែលលោកអញ្ជើញសម្ពោធមណ្ឌលព្យាបាលថ្មី ក្នុងទីក្រុងប៊ូនីយ៉ា (Bunia) ភាគខាងកើតប្រទេសកុងហ្គោ។​​​ នេះបើយោងតាមការចេញផ្សាយដោយ​ ទីភ្នាក់ងារសារព័ត៌មាន​ Reuters។

លោក ថេដ្រូស បានបញ្ជាក់ថា ទោះបីជាវីរុសអេបូឡាប្រភេទ Bundibugyo នេះ មិនទាន់មានវ៉ាក់សាំង ឬថ្នាំព្យាបាលផ្លូវការក៏ដោយ ប៉ុន្តែអ្នកជំងឺនៅតែអាចជាសះស្បើយបាន ប្រសិនបើពួកគេមកទទួលការព្យាបាលទាន់ពេលវេលា។ បច្ចុប្បន្ន ជំងឺនេះមានករណីសង្ស័យឆ្លងជាង ៩០០ករណី និងសង្ស័យស្លាប់ ២២៣នាក់ ខណៈដែលប្រទេសជិតខាងអ៊ូហ្គង់ដា (Uganda) ក៏មានអ្នកឆ្លង ៩នាក់ និងស្លាប់ម្នាក់ផងដែរ។

កិច្ចប្រឹងប្រែងទប់ស្កាត់ជំងឺរាតត្បាតនេះ កំពុងជួបឧបសគ្គយ៉ាងធ្ងន់ធ្ងរ ដោយសារការរអាក់រអួលពីសំណាក់ប្រជាជន ដែលខឹងសម្បារនឹងបំរាមមិនឱ្យធ្វើពិធីបុណ្យសពតាមប្រពៃណី ព្រមទាំងការគំរាមកំហែងពីក្រុមឧទ្ទាមប្រដាប់អាវុធនៅតំបន់នោះ។ ទោះជាយ៉ាងណា ក្រុមគ្រូពេទ្យកុងហ្គោនៅតែបង្ហាញក្តីសង្ឃឹមយ៉ាងមុតមាំថា ការព្យាបាលតាមរោគសញ្ញានាពេលបច្ចុប្បន្ន មានប្រសិទ្ធភាពជួយសង្គ្រោះជីវិតអ្នកជំងឺ ហើយពួកគេជឿជាក់ថានឹងអាចគ្រប់គ្រងការផ្ទុះឡើងនេះបានក្នុងពេលឆាប់ៗ៕