(ហ៊្សេរុយសាឡិម)៖ កាលពីថ្ងៃសៅរ៍ ទី១៦ ខែឧសភា ឆ្នាំ២០២៦ អ៉ីស្រាអែលបានអះអាងថា ខ្លួនបានសម្លាប់មេដឹកនាំយោធារបស់ក្រុមហាម៉ាសប៉ាឡេស្ទីន លោក Ezzedine Al-Haddad ក្នុងការវាយប្រហារតាមផ្លូវអាកាសនៅតំបន់ហ្កាហ្សា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

យោធាអ៉ីស្រាអែល បាននិយាយថា ការវាយប្រហារបានធ្វើឡើងកាលពីថ្ងៃសុក្រ។ ក្រុមហាម៉ាស ក៏បានចេញមុខទទួលស្គាល់ផងដែរ ហើយថាលោក Haddad ត្រូវបានសម្លាប់រួមជាមួយប្រពន្ធនិងកូនស្រី។ យោធាអ៉ីស្រាអែល បានឱ្យដឹងថា លោក Haddad គឺជាម្នាក់ក្នុងចំណោមមេបញ្ជាការជាន់ខ្ពស់ប៉ុន្មាននាក់ចុងក្រោយ​ នៃជួរយោធារបស់ហាម៉ាស ដែលបានដឹកនាំការរៀបចំផែនការ និងការអនុវត្តសកម្មភាពវាយប្រហារដ៏ភ្ញាក់ផ្អើល កាលពីថ្ងៃទី៧ ខែតុលា ឆ្នាំ២០២៣ លើអ៉ីស្រាអែល។

កើតឆ្នាំ១៩៧០ លោក Haddad បានឡើងកាន់តំណែងជាមេដឹកនាំយោធារបស់ហាម៉ាស កាលពីខែឧសភា ឆ្នាំ២០២៥ បន្ទាប់ពីមេបញ្ជាការមុនគឺលោក Mohammed Sinwar ត្រូវបានសម្លាប់ ក្នុងការវាយប្រហារតាមអាកាសដូចគ្នា។ ចាប់តាំងពីសង្រ្គាមផ្ទុះឡើង អ៉ីស្រាអែលបានសម្លាប់មេដឹកនាំហាម៉ាសជាបន្តបន្ទាប់ ក្នុងនោះរួមមានទាំងលោក Yahya Sinwar ដែលត្រូវបានចាត់ទុកជាមេខ្លោងធំនៃការវាយប្រហារ៧ តុលា និងលោក Mohamed Deif ដែលជាមេដឹកនាំយោធា​កាន់តំណែងយូរឆ្នាំរបស់ក្រុមហាម៉ាស និងជាស្ថាបនិកសំខាន់ម្នាក់ទៀត នៃព្រឹត្តិការណ៍ ៧ តុលា។

គួរបញ្ជាក់ថា សង្រ្គាមសងសឹករបស់អ៉ីស្រាអែលនៅតំបន់ហ្កាហ្សា បានផ្តាច់ជីវិតមនុស្សសរុបជាង ៧២​ ៧០០នាក់។ ទោះបីមានបទឈប់បាញ់ តាំងតែខែតុលា ឆ្នាំមុនក៏ដោយ អំពើហិង្សានៅតែកើតមានសឹងរៀងរាល់ថ្ងៃនៅហ្កាហ្សា ស្របពេលដែលការវាយប្រហាររបស់អ៉ីស្រាអែលនៅតែបន្ត ដោយហាម៉ាស និង​យោធាអ៉ីស្រាអែលចោទគ្នាទៅវិញទៅមក អំពីការបំពានបទឈប់បាញ់នោះ។ យោងតាមក្រសួងសុខាភិបាលហ្កាហ្សា គិតចាប់តាំងពីមានបទឈប់បាញ់ ជនជាតិប៉ាឡេស្ទីនយ៉ាងហោច៨៥៦នាក់ ត្រូវបានសម្លាប់ ខណៈយោធាអ៉ីស្រាអែល បានអះអាងថា ទាហានខ្លួន៥នាក់ បានស្លាប់នៅហ្កាហ្សា៕