(វ៉ាស៊ីនតោន)៖ រដ្ឋាភិបាលសហរដ្ឋអាមេរិក នាថ្ងៃអង្គារនេះបានបញ្ជាក់ថា ប្រទេសអ៊ីរ៉ង់មិនទាន់បានបំពានលើបទឈប់បាញ់ដ៏ផុយស្រួយនោះឡើយទេ បន្ទាប់ពីភាគីទាំងពីរបានបើកការបាញ់ប្រហារដាក់គ្នា កាលពីថ្ងៃចន្ទ អំឡុងពេលដែលកងទ័ពអាមេរិកព្យាយាមបើកផ្លូវឱ្យនាវាចរណ៍នៅច្រកសមុទ្រហ័រមូស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

យោធាអាមេរិកបានឱ្យដឹងថា ខ្លួនបានកម្ទេចទូកតូចៗរបស់អ៊ីរ៉ង់ចំនួន ៦គ្រឿង រួមទាំងមីស៊ីលគ្រូស និងដ្រូនជាច្រើនគ្រឿងទៀត បន្ទាប់ពីប្រធានាធិបតី លោក ដូណាល់ ត្រាំ បានបញ្ជាឱ្យកងទ័ពជើងទឹកនាំផ្លូវនាវាដឹកប្រេងឱ្យចាកចេញពីតំបន់រាំងខ្ទប់ ក្រោមយុទ្ធនាការ «Project Freedom»។

ទោះជាយ៉ាងណា រដ្ឋមន្ត្រីការពារជាតិអាមេរិក លោក ភីត ហេចសេត (Pete Hegseth) បានសង្កត់ធ្ងន់ថា បេសកកម្មនេះមានលក្ខណៈការពារតែប៉ុណ្ណោះ ហើយបទឈប់បាញ់ដែលមានរយៈពេលបួនសប្តាហ៍មកហើយនោះ មិនទាន់ត្រូវបានបញ្ចប់ឡើយ។ លោកបានបញ្ជាក់ថា «យើងមិនចង់បង្កសង្គ្រាមទេ...បច្ចុប្បន្នបទឈប់បាញ់នៅតែមានសុពលភាព ប៉ុន្តែយើងនឹងតាមដានស្ថានការណ៍យ៉ាងហ្មត់ចត់បំផុត»។

ដោយឡែក ខាងភាគីអ៊ីរ៉ង់ក៏បានបាញ់មីស៊ីលទៅលើនាវាចម្បាំងអាមេរិក កាលពីថ្ងៃចន្ទ ព្រមទាំងបានវាយប្រហារលើប្រទេសអេមីរ៉ាតអារ៉ាប់រួម (UAE) ផងដែរ។ ប្រធានសភាអ៊ីរ៉ង់ លោក ម៉ូហាំម៉ាត់ បាខឺ កាលីបាហ្វ (Mohammad Baqer Qalibaf) បានចោទប្រកាន់សហរដ្ឋអាមេរិក និងសម្ព័ន្ធមិត្តថា ជាអ្នកបំពានបទឈប់បាញ់ និងធ្វើឱ្យនាវាចរណ៍មានគ្រោះថ្នាក់។ លោកបានឌឺដងតាមបណ្តាញសង្គមថា «យើងដឹងច្បាស់ថា ស្ថានភាពបច្ចុប្បន្នគឺជាបន្ទុកដ៏ធ្ងន់ដែលអាមេរិកមិនអាចទ្រាំទ្របាន ខណៈដែលយើងមិនទាន់ទាំងបានចាប់ផ្តើម (វាយបក) អ្វីនៅឡើយផង»៕​