(ហ្សាការតា)៖ បេសកជនពិសេសឥណ្ឌូណេស៉ី ទទួលបន្ទុកថាមពល និងបរិស្ថាន លោក Hashim Djojohadikusumo បាននិយាយថា រុស្ស៊ីយល់ព្រមផ្គត់ផ្គង់ប្រេង ១៥០លានបារ៉ែលដល់ប្រទេសឥណ្ឌូណេស៉ី បន្ទាប់ពីដំណើរទស្សនកិច្ចនាពេលថ្មីៗរបស់លោកប្រធានាធិបតី Prabowo Subianto ទៅកាន់ទីក្រុងមូស្គូ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសុក្រ ទី២៤ ខែមេសា ឆ្នាំ២០២៦។

ដូច​ប្រទេស​ជាច្រើន​ទៀត ​ឥណ្ឌូណេស៉ីក៏​បាន​រង​សម្ពាធ​ពី​ការ​កើនឡើង​នូវ​តម្លៃ​ប្រេងជាសកល​ ដោយសារវិបត្តិ​សង្គ្រាម​នៅ​មជ្ឈិមបូព៌ាផងដែរ ហើយ​កំពុង​ខិតខំ​ស្វែងរក​ប្រភពផ្គត់ផ្គង់​ជំនួស។ ប្រហែល ២៥ភាគរយនៃការនាំចូលប្រេងឆៅរបស់ឥណ្ឌូណេស៉ី គឺបានមកពីមជ្ឈិមបូព៌ា ឆ្លងកាត់ច្រកសមុទ្រ Hormuz។

ទីភ្នាក់ងារព័ត៌មានរដ្ឋ Antara បានដកស្រង់សម្តីលោក Hashim ដែលនិយាយថា «ឥឡូវនេះ ឥណ្ឌូណេស៉ី ទទួលបានការប្តេជ្ញាចិត្តពីរដ្ឋាភិបាលរុស្ស៉ី។ យើងអាចនឹងមានប្រេងស្តុក ១៥០លានបារ៉ែល ដើម្បីដោះស្រាយបញ្ហាប្រែប្រួលសេដ្ឋកិច្ច»។ តាមលោក Hashim រុស្ស៉ី​​ព្រមលក់ប្រេង ១០០លាន​បារ៉ែល​​ក្នុង​តម្លៃ​ពិសេស ហើយនឹងបន្ថែម ៥០លាន​បារ៉ែល​ទៀត​ ប្រសិនបើឥណ្ឌូណេស៉ី​ត្រូវការ​នៅ​ពេល​ក្រោយ។

គួរបញ្ជាក់ថា កាលពីសប្តាហ៍មុន លោក Prabowo បានជួបប្រធានាធិបតីរុស្ស៉ី លោក វ្ល៉ាឌីមៀ ពូទីន នៅឯវិមានក្រឹមឡាំង ជាទីដែលមេដឹកនាំទាំងពីរ បានពិភាក្សាអំពីការពង្រឹងភាពជាដៃគូយុទ្ធសាស្រ្តរុស្ស៉ី-ឥណ្ឌូណេស៉ី រួមទាំងនៅក្នុងវិស័យថាមពល៕