(តៃប៉ិ)៖ មេដឹកនាំគណបក្សប្រឆាំងធំជាងគេបង្អស់នៅកោះតៃវ៉ាន់ នាថ្ងៃពុធ ទី១ ខែមេសា បាននិយាយថា ចំពោះមុខស្ថានការណ៍អន្តរជាតិ​ដ៏ជ្រួលច្របល់នាពេលនេះ ពិភពលោកមិនត្រូវការការផ្ទុះវិបត្តិថ្មីផ្សេងទៀត ដោយសារតែបញ្ហាកោះតៃវ៉ាន់នោះឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោកស្រី Cheng Li-wun ដែលជាប្រធានគណបក្ស Kuomintang (KMT) នឹងត្រូវធ្វើដំណើរទៅកាន់ប្រទេសចិន នាថ្ងៃអង្គារសប្តាហ៍ក្រោយ ដើម្បីបំពេញទស្សនកិច្ចរយៈពេល៦ថ្ងៃ តបតាមការអញ្ជើញរបស់ប្រធានាធិបតីចិន លោក ស៉ី ជីនពីង។ លោកស្រី Cheng បាននិយាយថា ប្រជាជនតៃវ៉ាន់ មិនចង់ឱ្យដែនកោះនេះ ក្លាយជាកន្លែងដ៏គ្រោះថ្នាក់បំផុតរបស់ពិភពលោក ដែលអាចផ្ទុះសង្រ្គាមនៅពេលណាមួយ នោះឡើយ។

លោកស្រីបាននិយាយយ៉ាងដូច្នេះថា «អ្វីដែលយើងកំពុងព្យាយាមលើកកម្ពស់ គឺសន្តិភាពនិងការផ្សះផ្សា ដែលរួមមានទាំង​ការផ្សះផ្សា​រវាងគណបក្សកាន់អំណាច និងគណបក្សប្រឆាំងនៅក្នុងតៃវ៉ាន់ផ្ទាល់ ក៏ដូចជាការផ្សះផ្សានិងសន្តិភាព នៅត្រើយទាំងសងខាង​នៃច្រកសមុទ្រតៃវ៉ាន់។ គ្មាននរណាម្នាក់ចង់ឃើញច្រកសមុទ្រតៃវ៉ាន់ ធ្លាក់ចូលវិបត្តិយោធាដ៏តានតឹងជាថ្មីម្តងទៀត ក្នុងពេលមួយដែលស្ថានការណ៍អន្តរជាតិ កំពុងជួបភាពជ្រួលច្របល់ខ្លាំងរួចស្រេចទៅហើយនោះឡើយ»។

គួរបញ្ជាក់ថា ចិនចាត់ទុកតៃវ៉ាន់ជាផ្នែកមិនអាចកាត់ផ្តាច់បាននៃទឹកដីរបស់ខ្លួន ហើយបានបង្កើនសម្ពាធជាខ្លាំងទាំងផ្នែកនយោបាយ និងយោធាលើរដ្ឋាភិបាលបក្ស DPP របស់មេដឹកនាំ លោក Lai Ching-te ដែលទីក្រុងប៉េកាំងហៅថា ជាបុគ្គលប៉ុនប៉ងបំបែករដ្ឋដ៏គ្រោះថ្នាក់។ ការស្ទង់មតិនៅតៃវ៉ាន់ ភាគច្រើនបានបង្ហាញថា មានសំឡេងគាំទ្រតិចតួចប៉ុណ្ណោះ ដែលព្រមទទួលយកអធិបតេយ្យរបស់ទីក្រុងប៉េកាំង ក្រោមគំរូ «ប្រទេសមួយ ប្រព័ន្ធគ្រប់គ្រងពីរ»។ ចិនមិនដែលប្រកាសបោះបង់ចោលទេ នូវ​ជម្រើសប្រើប្រាស់កម្លាំង ដើម្បីគ្រប់គ្រងកោះតៃវ៉ាន់ ប្រសិនបើចាំបាច់៕