(Florida)៖ អភិបាលរដ្ឋ Florida លោក Ron DeSantis បានចុះហត្ថលេខាលើសេចក្តីព្រាងច្បាប់មួយ ឱ្យប្តូរឈ្មោះអាកាសយានដ្ឋានអន្តរជាតិ Palm Beach International Airport ទៅជាឈ្មោះ Donald J. Trump International Airport វិញ បន្ទាប់ពីឈ្មោះរបស់លោកប្រធានាធិបតីអាមេរិក ត្រូវបានរំលេចឡើងនៅលើអគារ ស្ថាប័ន កម្មវិធី​រដ្ឋាភិបាល នាវា​ចម្បាំង និងរួមទាំងក្រដាស​ប្រាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី៣១ ខែមីនា ឆ្នាំ២០២៦។

ការសម្រេចប្តូរឈ្មោះអាកាសយានដ្ឋាននេះ ធ្វើឡើងបន្ទាប់ពីការអនុម័តយល់ព្រមរបស់រដ្ឋ Florida លើផែនការមួយកាលពីឆ្នាំមុន ដើម្បីបរិច្ចាគទីតាំងអចលនទ្រព្យមួយកន្លែង នៅកណ្តាលទីក្រុង Miami ធ្វើជាទីតាំងបណ្ណាល័យប្រធានាធិបតីរបស់លោក ត្រាំ។

មុនពេលអាចផ្លាស់ប្តូរជាសាធារណៈ សំណើផ្លូវការមួយត្រូវដាក់ជូនរដ្ឋបាលអាកាសចរណ៍សហព័ន្ធអាមេរិក ដែលបន្ទាប់មក ត្រូវធ្វើបច្ចុប្បន្នភាពឈ្មោះថ្មីនោះ ទៅក្នុងប្រព័ន្ធផែនទីនិងទិន្នន័យអាកាសចរណ៍នានា ហើយស្លាកសញ្ញាសម្គាល់អាកាសយានដ្ឋាន ក៏ត្រូវតែផ្លាស់ប្តូរដែរ៕