(ម៉ានីល)៖ នាថ្ងៃសុក្រ ទី២៧ ខែមីនា ប្រធានាធិបតីហ្វីលីពីន លោក Ferdinand Marcos Jr. បាននិយាយថា កិច្ចប្រជុំកំពូល​រវាងមេដឹកនាំអាស៊ាន នឹងរៀបចំឡើងនៅខែឧសភាតាមការគ្រោងទុក ប៉ុន្តែនឹងកាត់បន្ថយមកនៅត្រឹមរបៀបវារៈចម្បងៗមួយចំនួន ដែលផ្តោតលើការដោះស្រាយបញ្ហាដូចជា ការផ្គត់ផ្គង់ប្រេងឥន្ធនៈ តម្លៃស្បៀង និងពលករចំំណាកស្រុក។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters។

លោក Marcos បាននិយាយថា ការសម្រេចចិត្តនេះធ្វើឡើង ក្រោយការពិគ្រោះយោបល់គ្នាជាមួយបណ្តាមេដឹកនាំអាស៊ានដទៃទៀត។ លោកប្រធានាធិបតីហ្វីលីពីន បាននិយាយយ៉ាងដូច្នេះថា «ខ្ញុំបានសាកសួរទៅកាន់សមាជិកអាស៊ានថា ដោយសារគ្រប់គ្នាកំពុងមមាញឹកជាមួយវិបត្តិប្រេងបែបនេះ ដែលបង្កឡើងដោយ​សង្រ្គាមនៅមជ្ឈិមបូព៌ា តើយើងទាំងអស់គ្នាចង់លើកពេលកិច្ចប្រជុំអាស៊ាន ដែរឬយ៉ាងណា។ ចម្លើយមូលមតិគ្នា គឺឥឡូវនេះជាពេលដ៏ចាំបាច់តែម្តង ដែលពួកយើងត្រូវសហការកិច្ចប្រឹងប្រែងរួមគ្នា។ ដូច្នេះវាជាអ្វីដែលយើងនឹងធ្វើ។ យើងនឹងរៀបចំកិច្ចប្រជុំកំពូលអាស៊ាន តាមការគ្រោងទុក»។

លោក Marcos ដែលមានឋានៈជាប្រធានប្តូរវេនអាស៊ានឆ្នាំនេះ បានលើកឡើងថា កិច្ចប្រជុំនឹងបន្ថយរបៀបវារៈ មកត្រឹមផ្តោតសំខាន់លើប្រធានបទចម្បង៣ រួមមានប្រេង ស្បៀងអាហារ និងពលករចំណាកស្រុក។ លោក Marcos បានលើកឡើងថា កិច្ចប្រជុំខែឧសភា នឹងមានសារសំខាន់ជាខ្លាំង ដើម្បីជួយមេដឹកនាំប្រទេសអាស៊ានទាំងអស់ កំណត់នូវ «អ្វីដែលពួកយើងត្រូវធ្វើនាពេលអនាគត អ្វីដែលយើងត្រូវធ្វើសម្រាប់ឆ្នាំនេះ របៀបដែលយើងអាចជួយគ្នាទៅវិញទៅមក និង​អ្វីទៅជាគោលជំហររបស់អាស៊ាន ពាក់ព័ន្ធផលប៉ះពាល់ដ៏ភ្ញាក់ផ្អើលភ្លាមៗទាំងនេះ ដែលកំពុងឆ្ពោះមករកពួកយើង»។

គួរបញ្ជាក់ថា សង្រ្គាមអាមេរិកនិងអ៉ីស្រាអែល ជាមួយអ៉ីរ៉ង់នៅមជ្ឈិមបូព៌ា ចាប់តាំងពីចុងខែកុម្ភៈ បានជះផលប៉ះពាល់ជុំវិញពិភពលោក។ ដោយសារតែជម្លោះនេះ បណ្តាប្រទេសអាស៊ាន បានមើលឃើញតម្លៃប្រេងឥន្ធនៈនៅក្នុងប្រទេសពួកគេ ហក់ឡើងខ្ពស់ខ្លាំង ដ្បិតច្រកសមុទ្រ Hormuz ដែលជាច្រកផ្លូវទឹកយុទ្ធសាស្រ្ត សម្រាប់ការដឹកជញ្ជូនប្រេងនិងឧស្ម័នប្រមាណ ២០ភាគរយរបស់ពិភពលោក ត្រូវបានបិទខ្ទប់សឹងទាំងស្រុង ចាប់តាំងពីសង្រ្គាមផ្ទុះឡើង៕