(Yaounde, កាមេរូន)៖ កាលពីថ្ងៃព្រហស្បតិ៍សប្តាហ៍នេះ ប្រធានអង្គការពាណិជ្ជកម្មពិភពលោក (WTO) បានអំពាវនាវដល់ប្រទេសនានា ឱ្យរួមគ្នាកែប្រែច្បាប់ពាណិជ្ជកម្មសកល ដោយនិយាយថា សណ្តាប់ធ្នាប់ពិភពលោកពីមុនបានរលាយបាត់មិនវិលវិញ ក្រោយរយៈពេលមួយឆ្នាំនៃភាពចលាចល ដែលបង្កឡើងដោយពន្ធគយអាមេរិក និងភាពតានតឹងកាន់តែទូលំទូលាយខាងភូមិសាស្ត្រនយោបាយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៧ ខែមីនា ឆ្នាំ២០២៦។

នៅពេលចាប់ផ្តើមកិច្ចប្រជុំរយៈពេល ៤ថ្ងៃរបស់ WTO ក្នុងប្រទេសកាមេរូន លោកស្រី Ngozi Okonjo-Iweala ក៏បានដាក់ចេញនូវបញ្ជីបញ្ហាប្រឈម រួមទាំងភាពជាប់គាំងនៃយន្តការដោះស្រាយវិវាទរបស់ WTO ផងដែរ។ លោកស្រីបានគូសបញ្ជាក់យ៉ាងដូច្នេះថា «សណ្តាប់ធ្នាប់ពិភពលោក និងប្រព័ន្ធពហុភាគីដែលយើងធ្លាប់ស្គាល់ បានប្រែប្រួលហើយ ហេតុនេះយើងត្រូវតែសម្លឹងទៅអនាគត»។

កិច្ចប្រជុំក្នុងទីក្រុង Yaounde បានកើតឡើងចំពោះមុខការព្រួយបារម្ភកាន់តែខ្លាំងអំពីផលប៉ះពាល់នៃសង្គ្រាមអាមេរិក-អ៉ីស្រាអែលជាមួយអ៉ីរ៉ង់ និងបន្ទាប់ពីកិច្ចព្រមព្រៀងពាណិជ្ជកម្មពហុភាគី បានជាប់គាំងអស់រយៈពេលជាច្រើនឆ្នាំ។ លំនាំនៃការឯកភាពគ្នាបច្ចុប្បន្នរបស់ WTO ត្រូវបានជាប់គាំង​ ដោយសារតែការជំទាស់ពីប្រទេសមួយចំនួន។

ក្រុមប្រតិភូកំពុងជំរុញ WTO អនុញ្ញាតឱ្យមានក្រុមសមាជិកបង្កើតកិច្ចព្រមព្រៀង នៅក្នុងអង្គការមួយនេះ។ ក្រុមអ្នកការទូត និង​មន្ត្រី​ពាណិជ្ជកម្ម​បាន​ព្រមាន​ថា បើ​គ្មាន​កិច្ចព្រមព្រៀង​ធ្វើកំណែទម្រង់​ទេ ប្រទេស​នានា​អាច​បោះបង់ចោល​ឧត្តមគតិនៃ​ប្រព័ន្ធ​ពាណិជ្ជកម្ម​សកលដែលផ្អែក​លើ​ច្បាប់ ហើយ​កំណត់​បទប្បញ្ញត្តិ​ផ្ទាល់ខ្លួន​៕