(ហាណូយ)៖ ប្រទេសវៀតណាមនិងរុស្ស៉ី ត្រូវបានរំពឹងថា នឹងចុះកិច្ចព្រមព្រៀងថាមពលជាមួយគ្នា អំឡុងដំណើរទស្សនកិច្ចរបស់​នាយករដ្ឋមន្រ្តីវៀតណាម លោក Pham Minh Chinh រយៈពេល៤ថ្ងៃនៅទីក្រុងមូស្គូ ដែលបានចាប់ផ្តើមកាលពីថ្ងៃអាទិត្យ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី២៣ ខែមីនា ឆ្នាំ២០២៦។

កាលពីយប់ថ្ងៃអាទិត្យ រដ្ឋាភិបាលវៀតណាម បានប្រកាសឱ្យដឹងក្នុងសេចក្តីថ្លែងការណ៍ថា ភាគីទាំងពីរនឹងចុះកិច្ចព្រមព្រៀងសំខាន់ៗ ដែលផ្តោតលើវិស័យថាមពល ពាណិជ្ជកម្ម និងវិនិយោគ។ អំឡុងទស្សនកិច្ច លោក Chinh នឹងត្រូវបើកកិច្ចជួបពិភាក្សាជាមួយ​សមភាគីរុស្ស៉ី លោក Mikhail Mishustin ព្រមទាំងប្រធានាធិបតីរុស្ស៉ី លោក វ៉្លាឌីមៀ ពូទីន។

ការបំពេញទស្សនកិច្ចរបស់នាយករដ្ឋមន្រ្តីវៀតណាមនៅរុស្ស៉ី កើតមានឡើងស្របពេលដែលប្រទេសវៀតណាម បាននិងកំពុងប្រឈម​ការកើនឡើងខ្ពស់នៃតម្លៃប្រេងឥន្ធនៈ ចាប់តាំងពីសង្រ្គាមអាមេរិក-អ៉ីស្រាអែលជាមួយអ៉ីរ៉ង់ បានផ្ទុះឡើងនៅមជ្ឈិមបូព៌ា។ តាំងពីពេលនោះ ប្រេងសាំងនៅវៀតណាម បានកើន៥០ភាគរយ ខណៈប្រេងម៉ាស៊ូតបានកើន៧០ភាគរយ។

គួរបញ្ជាក់ថា រុស្ស៉ីមានក្រុមហ៊ុនប្រេងនិងឧស្ម័ន ធ្វើប្រតិបត្តិការនៅក្បែរឆ្នេរសមុទ្ររបស់វៀតណាម ខណៈប្រទេសទាំងពីរ ក៏បានស្ថិត​ក្នុងការពិភាក្សាដើម្បីឱ្យក្រុមហ៊ុនរុស្ស៉ី សាងសង់រោងចក្រថាមពលនុយក្លេអ៊ែរដំបូងបំផុតរបស់វៀតណាមផងដែរ។ ក្រុមមន្រ្តីបានបង្ហើបឱ្យដឹងថា ភាគីទាំងពីរទំនងអាចចុះហត្ថលេខាជាផ្លូវការ លើកិច្ចព្រមព្រៀងថាមពលនុយក្លេអ៊ែរ អំឡុងទស្សនកិច្ចរបស់លោក Chinh៕