(តៃប៉ិ)៖ យន្តហោះយោធា P-8A Poseidon ១គ្រឿងរបស់កងទ័ពជើងទឹកអាមេរិក បានធ្វើដំណើរឆ្លងកាត់ច្រកសមុទ្រតៃវ៉ាន់ កាលពីថ្ងៃពុធ ទី១១ ខែមីនា ក្នុងសកម្មភាពមួយ ដែលទីក្រុងវ៉ាស៉ីនតោនអះអាងថា ជាការបង្ហាញពីការប្តេជ្ញារបស់ខ្លួនចំពោះតំបន់ឥណ្ឌូ-ប៉ាស៉ីហ្វិក ដែលសេរីនិងបើកចំហ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការចល័តយន្តហោះខាងលើធ្វើឡើង មុនពេលប្រធានាធិបតីអាមេរិក លោក ដូណាល់ ត្រាំ គ្រោងបំពេញទស្សនកិច្ចមកកាន់ប្រទេសចិន នាចុងខែនេះ ស្របពេលដែលទីក្រុងវ៉ាស៉ីនតោន និងទីក្រុងប៉េកាំង ចង់ស្តារស្ថិរភាពទំនាក់ទំនងឡើងវិញ ក្រោយមានបញ្ហាជាច្រើនដូចជា​តៃវ៉ាន់ ជម្លោះពាណិជ្ជកម្ម និងការរឹតត្បិតបច្ចេកវិទ្យា។

កងកម្លាំង 7th Fleet នៃកងទ័ពជើងទឹកអាមេរិក បាននិយាយក្នុងសេចក្តីថ្លែងការណ៍ថា «តាមរយៈការធ្វើប្រតិបត្តិការនៅច្រកសមុទ្រតៃវ៉ាន់ ដោយស្របតាមច្បាប់អន្តរជាតិ សហរដ្ឋអាមេរិក រក្សាការពារសិទ្ធិនិងសេរីភាព​នៃការធ្វើដំណើររបស់ប្រជាជាតិនានា»។ ដោយឡែក យោធាចិនបាននិយាយថា ខ្លួនបានតាមដានសកម្មភាពយន្តហោះអាមេរិក​យ៉ាងដិតដល់ អំឡុងពេលហោះហើរឆ្លងកាត់នោះ។

គួរបញ្ជាក់ថា នាវានិងយន្តហោះយោធាអាមេរិក តែងធ្វើដំណើរជាប្រចាំឆ្លងកាត់ច្រកសមុទ្រតៃវ៉ាន់ ដែលជាផ្លូវទឹកនៅចន្លោះប្រទេសចិន និងកោះតៃវ៉ាន់ ហើយជារឿយៗ នាំឱ្យមានប្រតិកម្មមិនពេញចិត្តពីទីក្រុងប៉េកាំង។ ចិនចាត់ទុក​តៃវ៉ាន់ជាផ្នែកនៃទឹកដីរបស់ខ្លួន ដូច្នេះហើយចិនក៏មានយុត្តាធិការលើច្រកសមុទ្រតៃវ៉ាន់ដែរ។ ប៉ុន្តែតៃវ៉ាន់និងអាមេរិក បានប្រកែកថា វាគឺជាច្រកផ្លូវទឹកអន្តរជាតិ។ ចិនតែងតែព្រមានជានិច្ចថា បញ្ហាតៃវ៉ាន់គឺជាកិច្ចការផ្ទៃក្នុង និងជាបញ្ហាស្នូលបំផុតនៃផលប្រយោជន៍​របស់ទីក្រុងប៉េកាំង ហើយជាបន្ទាត់ក្រហមដែលមិនត្រូវឈានជើងរំលង ឬជាន់ឈ្លីដាច់ខាត៕