(វ៉ាស៊ីនតោន)៖ អ៉ីស្រាអែល និងសហរដ្ឋអាមេរិកបានកំណត់ពេលវេលានៃការវាយប្រហារលើអ៉ីរ៉ង់ កាលពីថ្ងៃសៅរ៍ ទី២៨ ខែកុម្ភៈ ឆ្នាំ២០២៦ ចំពេលមេដឹកនាំកំពូលអ៉ីរ៉ង់ លោក Ayatollah Ali Khamenei បើកកិច្ចប្រជុំជាមួយមន្ត្រីជំនិតៗរបស់លោក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

Reuters ធ្វើសេចក្ដីរាយការណ៍បែបនេះដោយផ្អែកលើប្រភពដែលខ្លួនទទួលបានពីមន្ត្រីអាមេរិក៣នាក់ ក្នុងលក្ខខណ្ឌមិនបញ្ចេញឈ្មោះ។ ដោយឡែក អ៉ីស្រាអែលបាននិយាយថាលោក Khamenei ត្រូវបានសម្លាប់រួមជាមួយមន្ត្រីកំពូលមួយចំនួនរបស់អ៉ីរ៉ង់ ក្នុងនោះរួមមានលោក Ali Shamkhani ជាអតីតលេខាធិការក្រុមប្រឹក្សាសន្តិសុខជាតិ និងលោក Mohammad Pakpour ជាមេបញ្ជាកងកម្លាំងឆ្មាំបដិវត្តន៍អ៉ីរ៉ង់។

បន្ថែមពីលើនេះ ប្រភពពីមន្ត្រីអ៉ីរ៉ង់២នាក់ក៏បានប្រាប់ Reuters​ ដែរថាលោក Khamenei កាលពីថ្ងៃសៅរ៍ម្សិលមិញ បានជួបលោក Shamkhani លេខាធិការក្រុមប្រឹក្សាសន្តិសុខជាតិ កំពូល លោក Ali Larijani នៅឯទីតាំងមួយកន្លែង មុននឹងសហរដ្ឋអាមេរិក និងអ៉ីស្រាអែលចាប់ផ្ដើមការវាយប្រហារ។ មន្ត្រីជាន់ខ្ពស់អ៉ីរ៉ង់ម្នាក់ថែមទាំងបានប្រាប់ Reuters សាកសពរបស់ លោក Khamenei ត្រូវបានរកឃើញហើយ។

គួរបញ្ជាក់ថា ប្រធានាធិបតីអាមេរិក លោក​ ដូណាល់ ត្រាំ កាលពីថ្ងៃសៅរ៍ បានអះអាងថាមេដឹកនាំកំពូលអ៉ីរ៉ង់ លោក Ayatollah Ali Khamenei ត្រូវបានសម្លាប់នៅក្នុង ការវាយប្រហារតាមផ្លូវអាកាសរួមគ្នាធ្វើឡើងដោយសហរដ្ឋអាមេរិក និងអ៉ីស្រាអែល។ មកទល់នឹងពេលនេះ អ៉ីរ៉ង់មិនទាន់ទទួលស្គាល់ថាតើមេដឹកនាំកំពូលរបស់ខ្លួនពិតជាស្លាប់មែន ឬក៏យ៉ាងណានៅឡើយទេ៕