(អូតាវ៉ា)៖ នាយករដ្ឋមន្ត្រីកាណាដា លោក Mark Carney បានឆ្លើយតបថា លោករំពឹងថារដ្ឋបាលអាមេរិក នឹងគោរពអធិបតេយ្យកាណាដា នៅពេលត្រូវគេបានសួរអំពីសេចក្តីរាយការណ៍មួយ ដែលថាមានជំនួបរវាងមន្ត្រីអាមេរិក ជាមួយក្រុមបំបែកខ្លួនស្វែងរកឯករាជ្យសម្រាប់ខេត្ត Alberta កាលពីថ្ងៃព្រហស្បតិ៍ ទី២៩ ខែមករា ឆ្នាំ ២០២៦។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

កាសែត Financial Times បានរាយការណ៍ថា មន្ត្រីក្រសួងការបរទេសអាមេរិក បានបើកកិច្ចប្រជុំចំនួន ៣ ជាមួយអង្គការ Alberta Prosperity Project (APP) ដែលជាក្រុមមួយកំពុងជំរុញឱ្យមានប្រជាមតិ ថាតើខេត្តភាគខាងលិចដែលជាជម្រុកនៃផលិតផលថាមពល គួរតែផ្តាច់ចេញពីប្រទេសកាណាដាឬទេ។

លោក Carney ប្រាប់អ្នកយកព័ត៌មានដូច្នេះថា «យើងសង្ឃឹមថា រដ្ឋបាលអាមេរិក គោរពអធិបតេយ្យកាណាដា។ ខ្ញុំតែងតែបញ្ជាក់ច្បាស់ ក្នុងពេលជជែកដល់បញ្ហានោះ ជាមួយប្រធានាធិបតី ត្រាំ»។ លោក Carney បន្ថែមថា លោកត្រាំ មិនដែលសួរនាំអំពី​ក្រុម​បំបែក​ខ្លួន Alberta មកកាន់រូបលោក​នោះទេ។

គួរបញ្ជាក់ថា ខេត្ត Alberta គឺគ្មានផ្លូវគោកទេ ហើយអភិបាលខេត្ត លោកស្រី Danielle Smith បាននិយាយថា លោកស្រីនៅតែចង់ស្ថិតក្រោមប្រទេសកាណាដា ប៉ុន្តែការស្ទង់មតិបង្ហាញថា ៣០ភាគរយនៃប្រជាជនក្នុងខេត្តនេះ មានការធុញទ្រាន់ទៅនឹងអ្វីដែលខ្លួនមើលឃើញថា ជាការជ្រៀតជ្រែកហួសហេតុរបស់ទីក្រុងអូតាវ៉ា។

តាមសេចក្តីរាយការណ៍ដដែលពី Financial Times ក្រុម APP ដែលនិយាយថាគោលនយោបាយរបស់ទីក្រុងអូតាវ៉ា កំពុងធ្វើឱ្យខេត្តនេះរងការគំរាមកំហែង ចង់ឱ្យមានការប្រជុំមួយទៀតនាខែក្រោយ ជាមួយមន្ត្រីរដ្ឋាភិបាល និងក្រសួងហិរញ្ញវត្ថុអាមេរិក ដើម្បីស្នើសុំជំនួយឥណទានចំនួន ៥០០ពាន់លានដុល្លារអាមេរិក៕