(ប៉េកាំង)៖ ប្រធានាធិបតីចិន លោក ស៊ី ជីនពីង បានធ្វើកិច្ចសន្ទនាតាមទូរស័ព្ទជាមួយអគ្គលេខាធិការបក្សកុម្មុយនីស្តវៀតណាម លោក តូ ឡឹម នៅថ្ងៃចន្ទនេះ ដោយជំរុញឱ្យមានការពង្រឹងទំនាក់ទំនង និងកិច្ចសហប្រតិបត្តិការកាន់តែស៊ីជម្រៅ។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

នៅក្នុងកិច្ចសន្ទនាដំបូងចាប់តាំងពីលោក ឡឹម ត្រូវបានបោះឆ្នោតជ្រើសរើសសារជាថ្មីកាលពីថ្ងៃសុក្រ លោក ស៊ី បានពណ៌នាប្រទេសទាំងពីរថាជា «សហគមន៍ដែលមានអនាគតរួមគ្នា»។ លោកបានអំពាវនាវឱ្យភាគីទាំងពីរ «រួមគ្នាប្រឆាំងនឹងអនុត្តរភាពនិយម និងការប្រឈមមុខដាក់គ្នារវាងប្លុក» ទោះបីជាលោកមិនបានបញ្ចេញឈ្មោះប្រទេសណាមួយក៏ដោយ។

គួរបញ្ជាក់ថា ការលើកឡើងនេះធ្វើឡើងចំពេលដែលវៀតណាមកំពុងពង្រឹងទំនាក់ទំនងជាមួយសហរដ្ឋអាមេរិក ដើម្បីបញ្ចៀសការដំឡើងពន្ធគយ ខណៈរដ្ឋបាលលោក ត្រាំ បានចោទប្រកាន់វៀតណាមថាជាច្រកដឹកជញ្ជូនបន្តសម្រាប់ទំនិញចិន។
លោក ស៊ី ក៏បានសង្កត់ធ្ងន់ថា ភាគីទាំងពីរត្រូវពង្រឹងទំនុកចិត្ត រក្សាគោលការណ៍គ្រឹះ និងការពារប្រឆាំងនឹងហានិភ័យ និងបញ្ហាប្រឈមផ្សេងៗ៕