(សាន់ហ្សូស៊េ)៖ រដ្ឋាភិបាលនៃប្រទេសកូស្តារីកា កាលពីថ្ងៃអង្គារ ទី១៣ ខែមករា បានឱ្យដឹងថា ខ្លួនបានរកឃើញផែនការប៉ុនប៉ងធ្វើឃាត ប្រធានាធិបតីលោក Rodrigo Chaves ស្របពេលដែលការបោះឆ្នោតថ្នាក់ជាតិ នឹងប្រព្រឹត្តទៅនាដើមខែកុម្ភៈ ហើយគណបក្សស្តាំនិយមរបស់លោក ត្រូវបានរំពឹងថា នឹងទទួលជ័យជម្នះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Jorge Torres ប្រធានទីភ្នាក់ងារចារកម្មរបស់ប្រទេសអាមេរិកកណ្តាលមួយនេះ បានអះអាងថា ទីភ្នាក់ងារទទួលបានព័ត៌មានថា មានឃាតករម្នាក់ត្រូវបានគេជួលឱ្យសម្លាប់លោក Chaves។ អគ្គរដ្ឋអាជ្ញាកូស្តារីកា លោក Carlo Diaz បានប្រាប់អ្នកសារព័ត៌មានថា ស្រ្តីម្នាក់ជាជនសង្ស័យ កំពុងស្ថិតក្រោមការស៉ើបអង្កេត ប៉ុន្តែពុំមានការបញ្ជាក់ព័ត៌មានលម្អិតជាងនេះទៀតទេ។ យ៉ាងណាមិញ លោក Diaz បាននិយាយថា មិនទាន់មានភស្តុតាង​នៃការជាប់ទាក់ទងគ្នា ទៅនឹងការបោះឆ្នោតប្រធានាធិបតីនិងការបោះឆ្នោតសភា ដែលគ្រោងរៀបចំឡើងនៅថ្ងៃទី១ ខែកុម្ភៈ ខាងមុខនេះទេ។

គួរបញ្ជាក់ថា លោក Charves គឺជាប្រធានាធិបតីដ៏មានប្រជាប្រិយមួយរូប ប៉ុន្តែរដ្ឋធម្មនុញ្ញរបស់ប្រទេស ហាមឃាត់មិនឱ្យរូបលោក អាចបន្តឈរឈ្មោះសម្រាប់អាណត្តិទី២ជាប់គ្នាឡើយ។ ដូច្នេះហើយ លោកបានគាំទ្រអតីតរដ្ឋមន្រ្តីមួយរូបរបស់លោក គឺលោកស្រី Laura Fernandez ឱ្យបន្តតំណែងពីរូបលោក។ នៅកូស្តារីកា ស្របពេលប្រធានាធិបតី មិនអាចឈរឈ្មោះសម្រាប់អាណត្តិទី២ជាប់គ្នាក៏ដោយ គឺអាចមានឱកាសឈរឈ្មោះម្តងទៀតបាន ក្រោយរយៈពេល៨ឆ្នាំកន្លងផុតទៅ បន្ទាប់ពីចប់អាណត្តិទី១៕