(សេអ៊ូល)៖ រដ្ឋអាជ្ញាពិសេសកូរ៉េខាងត្បូងបានស្នើឱ្យតុលាការកាត់ទោសប្រហារជីវិតអតីតប្រធានាធិបតី លោក Yoon Suk Yeol ពាក់ព័ន្ធនឹងបទចោទជាមេគំនិតរៀបចំ ការបះបោរមួយតាមរយៈការប្រកាសប្រើច្បាប់អាជ្ញាសឹកកាលពីខែធ្នូ ឆ្នាំ២០២៤។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កូរ៉េខាងត្បូងមិនធ្លាប់បានអនុវត្តការកាត់ទោសប្រហារជីវិតនោះទេ​ក្នុងពេលជិត ៣ទសវត្សរ៍មកនេះ។ នៅក្នុងសវនាការមួយនៅឯតុលាការ Seoul Central District កាលពីថ្ងៃអង្គារ ទី១៣ ខែមករា រដ្ឋអាជ្ញាម្នាក់បាននិយាយថាក្រុមអ្នកស៊ើបអង្កេតបានរកឃើញថាពិតជាមានការរៀបចំផែនការមួយតាមបញ្ជាដោយផ្ទាល់របស់លោក Yoon និងអតីតរដ្ឋមន្ត្រីការពារជាតិរបស់លោក គឺលោក Kim Yong-hyun ចុះកាលបរិច្ឆេទកាលពីខែតុលា ឆ្នាំ២០២៣ ដើម្បីរក្សាអំណាចរបស់លោក Yoon។

រដ្ឋអាជ្ញារូបនោះបានកត់សម្គាល់ដូច្នេះថា «លោក Yoon...បានអះអាងថាការដាក់ចេញច្បាប់អាជ្ញាសឹក គឺដើម្បីការពារប្រជាធិបតេយ្យសេរី ប៉ុន្តែទង្វើផ្ទុយពីរដ្ឋធម្មនុញ្ញ និង ការប្រកាសប្រើច្បាប់អាជ្ញាសឹកដោយខុសច្បាប់របស់លោកបានបំផ្លាញដំណើរការនៃរដ្ឋសភា និងគណៈកម្មការរៀបចំការបោះឆ្នោត...ព្រមទាំងបំផ្លាញប្រជាធិបតេយ្យសេរី នៅក្រោមច្បាប់រដ្ឋធម្មនុញ»។ រដ្ឋអាជ្ញាដដែលបន្ថែមថា លោក Yoon មិនបានបង្ហាញការសោកស្ដោយដោយស្មោះត្រង់នោះទេ ហើយក៏មិនបានធ្វើការសូមទោសទៅកាន់ ប្រជាជនកូរ៉េខាងត្បូងទាំងមូលនោះដែរ។

លោក Yoon ដែលមានវត្តមាននៅក្នុងសវនាការនោះដែរ បានគ្រវីក្បាល និងហាក់ដូចជាអស់សំណើច នៅពេលលោកស្ដាប់ឮរដ្ឋអាជ្ញាស្នើឱ្យតុលាការកាត់ទោសប្រហារជីវិត រូបលោក ខណៈអ្នកគាំទ្ររបស់លោកមួយចំនួនក្នុងតុលាការក៏បានសើច និងខ្លះទៀតប្រើពាក្យសម្ដីមិនសមរម្យ រហូតដល់ចៅក្រមប្រាប់ឱ្យរក្សាសណ្ដាប់ធ្នាប់។

គួរបញ្ជាក់ថា លោក Yoon មានអាយុ៦៥ឆ្នាំ បានច្រានចោលការចោទប្រកាន់ប្រឆាំងនឹងរូបលោក។ លោកត្រូវបានទីភ្នាក់ងារសារព័ត៌មាន​ Yonhap ដកស្រង់សម្ដីដោយ បាននិយាយថាការដែលលោកប្រកាសដាក់ច្បាប់អាជ្ញាសឹក មានគោលបំណងទប់ស្កាត់កុំឱ្យក្រុមមនុស្សទុច្ចរិតបំផ្លាញប្រទេសជាតិ ហើយថាការប្រកាសប្រើច្បាប់អាជ្ញាសឹកធ្វើឡើង ក្រោមក្របខណ្ឌនៃអំណាចជាប្រធានាធិបតីដែលច្បាប់បានអនុញ្ញាត។ តុលាការគ្រោងនឹងប្រកាសសាលក្រមលើសំណុំរឿងរបស់លោក Yoon នៅថ្ងៃទី១៩ ខែកុម្ភៈខាងមុខ។

ប៉ុន្តែការផ្តន្ទាទោសប្រហារជីវិតស្នើឡើងដោយរដ្ឋអាជ្ញា មិនមែនសុទ្ធតែត្រូវបានរក្សាទុកជាបានការនោះទេនៅក្នុងតុលាការកូរ៉េខាងត្បូង។ តួយ៉ាង នៅចន្លោះពីឆ្នាំ១៩៩៥-១៩៩៦ អតីតប្រធានាធិបតីកូរ៉េខាងត្បូង២រូប គឺលោក Chun Doo-hwan និង Roh Tae-woo ដែលត្រូវបានចោទប្រកាន់ពីបទបះបោរ ក៏ធ្លាប់ត្រូវបានរដ្ឋអាជ្ញាស្នើឱ្យកាត់ទោសប្រហារជីវិត និងដាក់ពន្ធនាគារអស់មួយជីវិតផងដែរ។ នៅពេលនោះ តុលាការជាន់ទាបកូរ៉េខាងត្បូងបានផ្តន្ទាទោសប្រហារជីវិតលោក Chun និងដាក់ពន្ធនាគារលោក Roh ២២ឆ្នាំកន្លះ មុននឹង សាលាឧទ្ធរណ៍បានបន្ធូរបន្ថយទោសលោក Chun ទៅជាជាប់ពន្ធនាគារអស់មួយជីវិត និងជាប់ពន្ធនាគារ ១៧ឆ្នាំសម្រាប់លោក Roh។

តែក្រោយមក អតីតប្រធានាធិបតីទាំង២ទទួលបានការលើកលែងទោសប្រធានាធិបតី ក្រោយចំណាយពេល២ឆ្នាំ ក្នុងពន្ធនាគារ។ តុលាការកូរ៉េខាងត្បូងបានចេញសាលក្រមផ្តន្ទាទោស ទោសប្រហារជីវិតលើកចុងក្រោយបំផុតកាលពីឆ្នាំ២០១៦ តែមិនមាននរណាម្នាក់ត្រូវបានប្រហារជីវិតនោះទេ ចាប់តាំងពីឆ្នាំ១៩៩៧មក៕