(ហ្សាការតា)៖ មេដឹកនាំនៃប្រទេសឥណ្ឌូណេស៉ី លោក Prabowo Subianto បានគូសបញ្ជាក់ពីការប្តេជ្ញាចំពោះគម្រោងគិតជាទឹកប្រាក់ ៣២ពាន់លានដុល្លារ ដើម្បីសាងសង់រដ្ឋធានីថ្មីរបស់ប្រទេសអាស៊ានមួយនេះ ស្របពេលដែលរូបលោកបានទៅធ្វើទស្សនកិច្ចនៅទីនោះជាលើកដំបូង ក្នុងនាមជាប្រធានាធិបតី។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី១៣ ខែមករា ឆ្នាំ២០២៦។

សំណួរអំពីជោគវាសនានៃគម្រោងរដ្ឋធានីថ្មី Nusantara បាននៅអែអង់ចាប់តាំងតែពីលោក Prabowo បានឡើងកាន់តំណែង កាលពីខែតុលា ឆ្នាំ២០២៤មក។ គម្រោងនេះ គឺជាមរតករបស់អតីតប្រធានាធិបតី លោក Joko Widodo ដែលកាលពីឆ្នាំ២០១៩ បានប្រកាសពី​ផែនការរបស់លោក ក្នុងការរើផ្លាស់រដ្ឋធានីចេញទៅចម្ងាយប្រមាណ១២០០គីឡូម៉ែត្រ ពីទីក្រុងហ្សាការតានៅកោះជ្វា ដែលបច្ចុប្បន្នកំពុងតែជួបបញ្ហាកកស្ទះខ្លាំង និងលិចចូលទៅក្នុងសមុទ្រដោយសន្សឹមៗ។

ការសាងសង់ទីក្រុង Nusantara ដែលស្ថិតនៅលើកោះ Borneo ទើបតែបានចាប់ផ្តើមកាលពីឆ្នាំ២០២២ ក្រោយពន្យារពេល ដោយសារវិបត្តិជំងឺរាតត្បាតសកលកូវីដ ហើយលោក Widodo បានខកខានសម្រេចគោលដៅផ្លាស់រដ្ឋាភិបាល​ទៅកាន់ទីនោះ នៅត្រឹមចុងអាណត្តិទី២ ដែលជាអាណត្តិកាន់អំណាចចុងក្រោយរបស់លោក កាលពីឆ្នាំ២០២៤។

កាលពីថ្ងៃចន្ទ ការិយាល័យរបស់លោក Prabowo បានចេញសេចក្តីថ្លែងការណ៍ថា ទស្សនកិច្ចរបស់លោក គឺជាជំហានដ៏សំខាន់មួយ ក្នុងដំណើរឆ្ពោះទៅកសាងទីក្រុងរដ្ឋធានី Nusantara ហើយវត្តមានរបស់លោកនាពេលនេះនៅទីនោះ ស្តែងឱ្យឃើញពីការប្តេជ្ញារបស់រដ្ឋាភិបាល ដើម្បីធានាថា ការអភិវឌ្ឍកំពុងប្រព្រឹត្តទៅស្របតាមផែនការ ហើយ​មាននិរន្តរភាព។

អាជ្ញាធរទទួលបន្ទុកការអភិវឌ្ឍរដ្ឋធានី Nusantara ក៏បានចេញសេចក្តីថ្លែងការណ៍ដាច់ដោយឡែកផងដែរថា ការិយាល័យ និងហេដ្ឋារចនាសម្ព័ន្ធគាំទ្រ សម្រាប់ស្ថាប័ននិតីប្រតិបត្តិ គឺត្រូវបានរៀបចំរួចរាល់ហើយ។ មិនតែប៉ុណ្ណោះ ការសាងសង់​កំពុងដំណើរការទៅ ដើម្បីសម្រេចតាមគោលដៅនៅឆ្នាំ២០២៧ សម្រាប់អគាររបស់ស្ថាប័ននីតិបញ្ញប្បត្តិនិងស្ថាប័នយុត្តិធម៌​ របស់រដ្ឋាភិបាល។

គួរបញ្ជាក់ថា កាលពីឆ្នាំមុន លោក Prabowo បានអនុម័តថវិកា៤៨.៨ទ្រីលានរូពី ឬស្មើនឹង២.៨៩ពាន់លានដុល្លារ សម្រាប់គម្រោងសាងសង់រដ្ឋធានី Nusantara រហូតដល់ឆ្នាំ២០២៩ ខណៈថវិកានោះមានទំហំត្រឹម៦០ភាគរយប៉ុណ្ណោះ នៃថវិកាដែលលោក Widodo បានចំណាយកាលពីចន្លោះឆ្នាំ២០២២ និងឆ្នាំ២០២៤។ កាលពីឆ្នាំ២០២៥ រដ្ឋាភិបាលលោក Prabowo មានកម្រិតឱនភាពថវិកាស្មើនឹង២.៩២%នៃ GDP ដែលជាគម្លាតដ៏ធំបំផុត គិតក្នុងរយៈពេល២ទសវត្សរ៍៕