(ហ៊្សេរុយសាឡិម)៖ ប្រភពពីប្រទេសអ៉ីស្រាអែល បានឱ្យដឹងថា អ៉ីស្រាអែលកំពុងប្រុងជើងការខ្ពស់ត្រៀមខ្លួន សម្រាប់លទ្ធភាពនៃការធ្វើអន្តរាគមន៍ណាមួយរបស់សហរដ្ឋអាមេរិក នៅក្នុងប្រទេសអ៉ីរ៉ង់ ស្របពេលដែលអាជ្ញាធរអ៉ីរ៉ង់ កំពុងប្រឈមមុខជាមួយ​ចលនាបាតុកម្មប្រឆាំងរដ្ឋាភិបាលដ៏ធំបំផុតមួយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី១១ ខែមករា ឆ្នាំ២០២៦។

ប៉ុន្មានថ្ងៃចុងក្រោយនេះ ប្រធានាធិបតីអាមេរិក លោក ដូណាល់ ត្រាំ បានគំរាមម្តងហើយម្តងទៀតថា អាចនឹងធ្វើអន្តរាគមន៍យោធានៅអ៉ីរ៉ង់ ហើយបានព្រមានថ្នាក់ដឹកនាំអ៉ីរ៉ង់ ប្រឆាំងការប្រើប្រាស់អំពើហិង្សាលើក្រុមបាតុករ។ កាលពីថ្ងៃសៅរ៍ លោក ត្រាំ បានប្រកាសជាថ្មីថា សហរដ្ឋអាមេរិកត្រៀមខ្លួនជាស្រេច ដើម្បីទៅជួយក្រុមបាតុករនៅអ៉ីរ៉ង់។

ប្រភពខាងលើដែលជាក្រុមបុគ្គលមានវត្តមាន អំឡុងការប្រឹក្សាយោបល់អំពីសន្តិសុខរបស់អ៉ីស្រាអែល នាចុងសប្តាហ៍នេះ មិនបាន​បញ្ជាក់ច្បាស់ថា តើការប្រុងជើងការខ្ពស់របស់អ៉ីស្រាអែល មានន័យយ៉ាងណាក្នុងស្ថានភាពជាក់ស្តែងនោះឡើយ។ អ៉ីស្រាអែលនិង​អ៉ីរ៉ង់ ធ្លាប់បានធ្វើសង្រ្គាមផ្លូវអាកាសរយៈពេល១២ថ្ងៃ កាលពីខែមិថុនា ឆ្នាំ២០២៥ ហើយអំឡុងពេលនោះ អាមេរិកក៏បានចូលរួម​ជាមួយអ៉ីស្រាអែល វាយប្រហារលើទីតាំងចម្រាញ់សារធាតុនុយក្លេអ៊ែររបស់អ៉ីរ៉ង់ផងដែរ។

គួរបញ្ជាក់ថា កាលពីថ្ងៃសៅរ៍ នាយករដ្ឋមន្រ្តីអ៉ីស្រាអែល លោក Benjamin Netanyahu និង​រដ្ឋមន្រ្តីការបរទេសអាមេរិក លោក Marco Rubio បានជួបសន្ទនាគ្នាតាមទូរសព្ទ។ មន្រ្តីអាមេរិក មិនបានប្រាប់ពីប្រធានបទនៃកិច្ចពិភាក្សានោះទេ ប៉ុន្តែបើយោងតាម​ប្រភពអ៉ីស្រាអែល ដែលមានវត្តមានអំឡុងកិច្ចសន្ទនានោះ គឺអ្នកទាំងពីរបានជជែកគ្នា អំពីលទ្ធភាពនៃការធ្វើអន្តរាគមន៍របស់អាមេរិក​នៅអ៉ីរ៉ង់។ មកទល់ពេលនេះ អ៉ីស្រាអែលមិនបានបង្ហាញសញ្ញាចង់ធ្វើអន្តរាគមន៍នៅអ៉ីរ៉ង់ទេ ស្របពេលដែលបាតុកម្មផ្ទុះរីករាលដាល​នៅក្នុងសាធារណរដ្ឋអ៉ីស្លាមមួយនេះ៕