(បរទេស)៖ ក្រុមហ៊ុនបច្ចេកវិទ្យាយក្ស Apple បានឈានចូលដល់យុគសម័យថ្មីមួយនៃការផ្លាស់ប្តូរថ្នាក់ដឹកនាំ ដោយលោក Tim Cook បានផ្ទេរតំណែងជានាយកប្រតិបត្តិ (CEO) ទៅឱ្យលោក John Ternus ដែលជាអតីតប្រធានផ្នែកវិស្វកម្ម Hardware របស់ក្រុមហ៊ុន។

ការផ្លាស់ប្តូរតំណែងជាផ្លូវការនេះបានធ្វើឡើងនៅថ្ងៃទី១ ខែកញ្ញា ឆ្នាំ២០២៦ ដោយបញ្ចប់អាណត្តិដឹកនាំរយៈពេល ១៥ឆ្នាំរបស់លោក Tim Cook ដែលបានដឹកនាំក្រុមហ៊ុនឱ្យស្ទុះហក់ឡើងដល់តម្លៃទីផ្សាររាប់លានលានដុល្លារ។ ក្រោយការចុះចេញពីតំណែង CEO លោក Tim Cook នឹងបន្តផ្លាស់ទៅទទួលតំណែងជា ប្រធានប្រតិបត្តិក្រុមប្រឹក្សាភិបាល (Executive Chairman)។

ក្នុងអាណត្តិដឹកនាំរបស់លោក Tim Cook ក្រុមហ៊ុន Apple បានរីកចម្រើនយ៉ាងខ្លាំង ដោយក្លាយជាក្រុមហ៊ុនមួយដែលមានតម្លៃទីផ្សារ និងប្រាក់ចំណូលខ្ពស់បំផុតក្នុងលោក។ លោកបានបន្សល់ទុកនូវចក្រភពអាជីវកម្មដែលមានគ្រឹះហិរញ្ញវត្ថុរឹងមាំ និងមានមូលដ្ឋានអតិថិជនប្រើប្រាស់ឧបករណ៍ Apple យ៉ាងច្រើនជុំវិញពិភពលោក។ ទោះបីជា Apple ស្ថិតក្នុងស្ថានភាពហិរញ្ញវត្ថុយ៉ាងរឹងមាំក៏ដោយ ក៏នាយកប្រតិបត្តិថ្មី លោក John Ternus ត្រូវទទួលរងសម្ពាធយ៉ាងខ្លាំងក្នុងការដឹកនាំក្រុមហ៊ុនឱ្យតាមទាន់គូប្រជែងក្នុង «សមរភូមិបច្ចេកវិទ្យាបញ្ញាសិប្បនិម្មិត (AI Race)» ដូចជា៖

១៖ ការប្រកួតប្រជែងយ៉ាងស្រួចស្រាវ ក្រុមហ៊ុនបច្ចេកវិទ្យាធំៗដូចជា Microsoft, Alphabet (Google) និង OpenAI បានដើរមុខយ៉ាងលឿនលើផ្នែកច្នៃប្រឌិត AI និងការបង្កើតកម្មវិធី AI ជំនាន់ថ្មី ដែលធ្វើឱ្យ Apple ត្រូវខិតខំប្រឹងប្រែងបន្ថែមទៀតដើម្បីកាត់បន្ថយគម្លាតនេះ។

២៖ យុទ្ធសាស្ត្ររបស់ CEO ថ្មី លោក John Ternus ត្រូវទទួលបន្ទុកជំរុញការអភិវឌ្ឍ AI ឱ្យទាន់ពេលវេលា និងធ្វើបមាណីយកម្មមុខងារ AI ចូលទៅក្នុងឧបករណ៍ Hardware និងប្រព័ន្ធប្រតិបត្តិការរបស់ Apple (ដូចជា iPhone, Mac, និងប្រព័ន្ធ Ecosystem ទាំងមូល) ដោយមិនឱ្យប៉ះពាល់ដល់រចនាសម្ព័ន្ធចំណេញរបស់ក្រុមហ៊ុនឡើយ។

៣៖ បណ្តាញផ្គត់ផ្គង់ និងការផលិត ក្រៅពីបញ្ហា AI លោក Ternus ក៏ត្រូវបន្តរៀបចំយុទ្ធសាស្ត្រ នៃខ្សែច្រវាក់ផ្គត់ផ្គង់ផលិតកម្មចេញពីប្រទេសចិន ដើម្បីកាត់បន្ថយហានិភ័យភូមិសាស្ត្រនយោបាយ និងរក្សាកម្រិតចំណេញ (margins) របស់ក្រុមហ៊ុន។

គួរជម្រាបថា ការឡើងកាន់កាប់តំណែងរបស់លោក John Ternus ត្រូវបានគេមើលឃើញថាជាជំហានដ៏សំខាន់មួយក្នុងការកំណត់វាសនារបស់ Apple សម្រាប់ទសវត្សរ៍ក្រោយថា តើក្រុមហ៊ុនអាចរក្សាប្រជាប្រិយភាព និងសមត្ថភាពប្រកួតប្រជែងក្នុងយុគសម័យ AI បានកម្រិតណានោះ។