(បរទេស)៖ លោក Sundar Pichai នាយកប្រតិបត្តិ (CEO) របស់ក្រុមហ៊ុន Google បានប្រកាសតាមរយៈបណ្តាញសង្គម X ថា កម្មវិធី Gemini បានក្លាយជាផលិតផលមួយក្នុងចំណោមផលិតផលដែលរីកចម្រើនលឿនបំផុតរបស់ក្រុមហ៊ុន ដោយទើបតែបានឆ្លងផុតចំនួន ១ពាន់លាននាក់ នៃចំនួនអ្នកប្រើប្រាស់សកម្មប្រចាំខែ។ លោក Pichai ក៏បានកត់សម្គាល់ថា វាគឺជាផលិតផលទី១៤ របស់ Google ដែលបានឈានដល់តួលេខ ១ ពាន់លាននាក់នេះ។

ជាមួយនឹងការកើនឡើងយ៉ាងឆាប់រហ័សនេះ Gemini កំពុងតែដេញទាន់ល្បឿនរបស់ ChatGPT របស់ OpenAI ដែលធ្លាប់បានឈានដល់ ១ពាន់លាននាក់នៃអ្នកប្រើប្រាស់សកម្មប្រចាំខែកាលពីខែមិថុនា។ ក្រុមហ៊ុនបាននិងកំពុងធ្វើការបញ្ចូល Gemini ទៅក្នុងផលិតផលរបស់ខ្លួនជាបន្តបន្ទាប់ ចាប់តាំងពី Search និង Workspace រហូតដល់ Android និងកម្មវិធីផ្ទាល់របស់វា។ ជាពិសេស AI Mode របស់ Google នៅក្នុង Search បានសម្រេចជោគជ័យយ៉ាងខ្លាំង ដោយមានអ្នកប្រើប្រាស់សកម្មប្រចាំខែលើសពី ១ ពាន់លាននាក់នៅទូទាំងពិភពលោក ប៉ុន្តែតួលេខនាថ្ងៃនេះគឺសំដៅលើកម្មវិធី Gemini ដោយឡែកប៉ុណ្ណោះ ហើយមិនរាប់បញ្ចូលអ្នកប្រើប្រាស់ AI មកពីប្រភពផ្សេងៗទៀតនោះទេ។

ក្រុមហ៊ុនក៏បានបន្តបញ្ចេញម៉ូដែល និងមុខងារថ្មីៗជាច្រើនទៀត រួមទាំង Gemini 3.5 Flash ផងដែរ ដែល Google បាននិយាយថា រចនាឡើងដើម្បីកែលម្អការសរសេរកូដ និងភារកិច្ចរបស់ AI-agent ស្វ័យប្រវត្តិ។ Google ក៏បានចែករំលែកតួលេខអំពីរបៀបដែលមនុស្សកំពុងប្រើប្រាស់ Chatbot នេះពិតប្រាកដ ដោយមាន ៦៣% នៃអ្នកប្រើប្រាស់ Gemini បាននិយាយផ្ទាល់ទៅកាន់កម្មវិធីជំនួយការនេះដោយប្រើមុខងារសំឡេង។ បន្ថែមពីនេះ ឥឡូវនេះ Gemini បង្កើតរូបភាពច្រើនជាង ១៥០លានរូបភាពជារៀងរាល់ថ្ងៃ យោងតាម Google។ ការកើនឡើងរបស់ Gemini មិនបានកម្រិតត្រឹមតែផលិតផលផ្ទាល់ខ្លួនរបស់ Google នោះទេ។ ក្រុមហ៊ុនបាននិយាយថា បច្ចុប្បន្នខ្លួនមានអ្នកប្រើប្រាស់សកម្មលើសពី ១០០ លាននាក់នៅលើប្រព័ន្ធ iOS។

គួរជម្រាបថា ការប្រកាសនេះបានធ្វើឡើងមុនព្រឹត្តិការណ៍ Made by Google ដែលត្រូវបានរំពឹងថានឹងមានការដាក់ចេញនូវមុខងារថ្មីៗដើរដោយថាមពល Gemini កាន់តែច្រើននៅទូទាំងឧបករណ៍ Pixel៕