ហាង គុយទាវ អូរឫស្សី បើកតាំងពីឆ្នាំ១៩៨១ នៅតែរក្សាបានរសជាតិដើម និងប្រជាប្រិយភាព ក្នុងរយៈពេលជាង៤០ កន្លងមកនេះ
14-02-2024 15:03
(ភ្នំពេញ)៖ ហាង គុយទាវ អូរឫស្សី ដែលបានបើកតាំងពីឆ្នាំ១៩៨១ មកនេះ នៅតែរក្សាបានរសជាតិដើម និងប្រជាប្រិយភាព អស់រយៈពេលជាង ៤០ឆ្នាំកន្លងមកនេះ។ តាមទម្លាប់ជារៀងរាល់ឆ្នាំ ហាងគុយទាវ វ័យចំណាស់ជាងគេមួយនៅភ្នំពេញនេះ បានរៀបចំកម្មវិធីដ៏ធំមួយក្នុងនោះមានទាំងការលោត ម៉ុងសាយ ផងដែរ ដើម្បីអបអរនៅភាពជោគជ័យក្នុងអាជីវកម្ម ក៏ដូចជាអបអរពិធីបុណ្យចូលឆ្នាំប្រពៃណីចិន ដែលទើបតែកន្លងទៅថ្មីៗនេះ។
នៅពេលនិយាយពីប្រជាប្រិយភាពហាង គុយទាវ អូរឫស្សី នរណាក៏ស្គាល់ដែរ ជាពិសេសអ្នករស់នៅក្នុងក្រុងភ្នំពេញតែម្ដង ដោយសារតែរសជាតិគុយទាវពោះជ្រូក គុយទាវសាច់ចិញ្ច្រាំ និងនំប៉ាវស្នូលសាច់ជ្រូក ដែលជាមីនុយប្រចាំហាង ធ្វើឱ្យអតិថិជនស្គាល់ហាងគុយទាវតជំនាន់មួយនេះ។
អ្វីដែលពិសេសទៅទៀតនោះ គឺរសជាតិឆ្ងាញ់ និងការរក្សាបាននូវរសជាតិដើមនៃគុយទាវប្រចាំហាង ដែលចងចិត្តអតិថិជនមិនអាចបំភ្លេចបាន ឱ្យតែចង់ញ៉ាំគុយទាវ គឺដឹងតែនឹកឃើញហាង គុយទាវ អូរឫស្សីតែម្ដង។ ចំណុចនេះហើយទើបធ្វើឱ្យហាង គុយទាវ អូរឫស្សី វិវត្តន៍ខ្លួន តាំងពីអាជីវកម្មជាលក្ខណៈគ្រួសារបែបសាមញ្ញមកជា អាហារដ្ឋានបែបទំនើបមួយនៅក្នុងទីក្រុង ជាមួយនឹងឡូហ្គូ ដែលចុះបញ្ជីស្លាកយីហោ នៅក្រសួងពាណិជ្ជកម្ម ហើយត្រូវបានទទួលស្គាល់យ៉ាងទូលំទូលាយ។
សូមជម្រាបដែរថា បច្ចុប្បន្នហាង គុយទាវ អូរឫស្សី មាន ៦សាខា មានដូចជា៖ គុយទាវអូរឫស្សីសាខាទី១ ទល់មុខផ្សារអូរឫស្សី គុយទាវអូរឫស្សីសាខាទី២ ផ្លូវសុហក គុយទាវអូរឫស្សីសាខាទី៣ ផ្លូវត្រសក់ផ្អែម គុយទាវអូរឫស្សីសាខាទី៣ ទល់មុខផ្សារចាស់ គុយទាវអូរឫស្សីសាខាទី៥ ទឹកល្អក់ និង គុយទាវអូរឫស្សីសាខាទី៦ ទល់មុខផ្សារ Global House៕
