(ភ្នំពេញ)៖ ក្នុងរយៈពេល៩ខែ ឆ្នាំ២០២៦នេះ កម្ពុជាបាននាំចូលស្ករស ក្នុងទំហំទឹកប្រាក់សរុបចំនួន ១៦៣លានដុល្លារអាមេរិក។

បើតាមរបាយការណ៍ របស់ក្រសួងពាណិជ្ជកម្ម, រយៈពេល៩ខែ ឆ្នាំ២០២៦នេះ កម្ពុជាបាននាំចូលស្ករស ក្នុងទំហំទឹកប្រាក់ចំនួន១៦៣លានដុល្លារ កើនឡើង៧៣.៨៦ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥ មានចំនួន៩៤លានដុល្លារ។

ដោយឡែកចំពោះការនាំចេញវិញ កម្ពុជាបាននាំចេញស្ករ ក្នុងទំហំទឹកប្រាក់ចំនួន១៨.៩លានដុល្លារ ធ្លាក់ចុះ៥៨ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥ មានចំនួន ៤៥លានដុល្លារ។

បើតាមលោក ហេង សុគង់ រដ្ឋលេខាធិការ​ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, គិតមកទល់បច្ចុប្បន្ន ​កម្ពុជាមានរោងចក្រផលិតស្ករស ពីអំពៅចំនួនពីរ គឺរោងចក្រកំពង់ស្ពឺស៊ូហ្គ័រ នៅខេត្តកំពង់ស្ពឺ និងរោងចក្ររបស់ក្រុមហ៊ុនកាម៉ាដេនូ វេនឈរ នៅខេត្តក្រចេះ។

រោងចក្រកំពង់ស្ពឺស៊ូហ្គ័រ មានសមត្ថភាពផលិតប្រមាណ ១៤ម៉ឺនតោនក្នុងមួយឆ្នាំ (ទិន្នន័យឆ្នាំ២០២៥) និងរោងចក្ររបស់ក្រុមហ៊ុនកាម៉ាដេនូ វេនឈរ មានសមត្ថភាពផលិត ១៥ ០០០តោន ក្នុងមួយឆ្នាំ ដែលទើបតែចាប់ផ្ដើមដំណើរការឡើងវិញ ក្រោយផ្អាកអស់រយៈពេល១០ឆ្នាំ។

លោក ហេង សុគង់ បានឱ្យដឹងថា បច្ចុប្បន្នតម្រូវការប្រើប្រាស់ស្ករសនៅកម្ពុជា ទាំងសម្រាប់ការបរិភោគ ធ្វើបង្អែម និងឧស្សាហកម្ម មានទំហំជាមធ្យមប្រមាណ ២៥ម៉ឺនតោនក្នុងមួយឆ្នាំ។ ជាមួយសមត្ថភាពផលិត​ត្រឹមតែជាង ១៥ម៉ឺនតោន តម្រូវឱ្យ​កម្ពុជានៅតែត្រូវនាំចូលស្ករសពីប្រទេសជិតខាងដូចជា វៀតណាម ថៃ ចិន ឥណ្ឌូនេស៊ី និងម៉ាឡេស៊ី។

ទោះជាយ៉ាងណា លោករំពឹងថានៅឆ្នាំ២០២៧ ផលិតកម្មស្ករសនៅកម្ពុជា នឹងអាចផលិតបានរហូតដល់ជាង ២៦​ម៉ឺនតោន បំពេញបាននូវ​តម្រូវការប្រើប្រាស់បច្ចុប្បន្ន​គ្រប់គ្រាន់​ ខណៈរោងចក្រកំពង់ស្ពឺ Sugar កំពុងពង្រីកខ្សែច្រវាក់ផលិតកម្មបន្ថែម​។ ​

ជាមួយគ្នានេះ លោក ហេង សុគង់ បានឱ្យដឹងដែរថា កន្លងមកកម្ពុជាក៏ធ្លាប់បានផលិតស្ករឆៅ (raw sugar) និងនាំចេញទៅកាន់ប្រទេសជាច្រើនដូចជា វៀតណាម អេស្ប៉ាញ អ៊ីតាលី ព្រុយណេ និងស្រីលង្កា៕