(ភ្នំពេញ)៖ ការធ្វើពាណិជ្ជកម្មរវាងកម្ពុជា និងថៃ ក្នុងរយៈពេល៩ខែ​ ឆ្នាំ២០២៦នេះ សម្រេចបានទឹកប្រាក់ ២ ០៨១លានដុល្លារ ថយចុះចំនួន២៨.៤៦% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដែលមានទឹកប្រាក់ ២ ៩០៩លានដុល្លារអាមេរិក។

របាយការណ៍បានបង្ហាញថា ការនាំចេញរបស់កម្ពុជា ទៅកាន់ប្រទេសថៃមានតម្លៃជាង ៥៣៨លានដុល្លារអាមេរិក ​ថយចុះ៦.៥២%។ ចំណែកឯការនាំចេញរបស់ថៃ មកកាន់កម្ពុជាវិញ ​មានការធ្លាក់ចុះ​គួរឱ្យកត់សម្គាល់ផងដែរមានទឹកប្រាក់ ១ ៥៤២លានដុល្លារអាមេរិក ​ថយចុះ ៣៣.៨៨%។

ការធ្លាក់ចុះនៃទំហំពាណិជ្ជកម្មនេះរវាងប្រទេសទាំងនេះ ​បន្ទាប់ពីភាគីទាំងពីរមានជម្លោះព្រំដែនជាមួយគ្នា ចាប់តាំងពីពាក់កណ្តាលឆ្នាំ២០២៥មក​ និងបានឈានទៅបិទព្រំដែនគោក ទាំងស្រុង។ ជាមួយគ្នានេះ ប្រមុខរដ្ឋាភិបាលកម្ពុជា បានសម្រេចបានហាមការនាំចូលទំនិញមួយចំនួនពីថៃ ដូចជាឧស្ម័ន ប្រេងឥន្ធនៈ បន្លែ និងផ្លែជាដើម។

ឧកញ៉ាបណ្ឌិត ស៊ិន ចន្ធី អគ្គនាយកក្រុមហ៊ុន ឡាញហល អេចប្រេស ​និងជាអ្នកជំនាញក្នុងវិស័យដឹកជញ្ជូន​​​ បានថ្លែងថា «តាំងពីកម្ពុជា មានបញ្ហាជាមួយថៃ ហើយថៃបានបិទព្រំដែនផ្លូវគោក តែនៅមានការដឹកជញ្ជូនខ្លះ តាមផ្លូវទឹក និងផ្លូវអាកាស ចំពោះទំនិញដែលចាំបាច់ប៉ុណ្ណោះ»។

ឧកញ៉ាបណ្ឌិត ស៊ិន ចន្ធី បានបញ្ជាក់ថា មែនទែនទៅទំនិញដែលកម្ពុជានាំចូលពីថៃនោះ មិនមែនជារបស់ថៃនោះទេ គឺជាផលិតផល ដែលក្រុមហ៊ុនអន្ដរជាតិ បានដាក់មូលដ្ឋានផលិតនៅប្រទេសថៃ៕