(ភ្នំពេញ)៖ លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃនិយ័តករមូលបត្រកម្ពុជា (ន.ម.ក) បានគូសបញ្ជាក់អំពីការវិវត្តន៍សំខាន់ៗ ក្នុងការគ្រប់គ្រងវិស័យទ្រព្យឌីជីថលនៅកម្ពុជា ​​ដោយរាជរដ្ឋាភិបាលបាននិងកំពុងរៀបចំ បទប្បញ្ញត្តិ និងច្បាប់​ ឆ្លើយតបទៅនឹងកិច្ចការពារវិនិយោគិនក្នុងវិស័យនេះ ក៏ដូចជាការពារវិស័យនេះពីការប្រឈមនឹងការលាងលុយកខ្វក់​ ​និងការរធានានូវបរិយាកាសវិនិយោគដែលមានសុវត្ថិភាព និងតម្លាភាព។

ថ្លែងប្រាប់អ្នកសារព័ត៌មានក្នុង «វេទិកាផ្សព្វផ្សាយសមិទ្ធផលអាណត្តិទី១ របស់អាជ្ញាធរសេវាហិរញ្ញវត្ថុមិនមែនធនាគារ និងសន្និសីទមូលបត្រ ប្រចាំឆ្នាំ២០២៦»នាថ្ងៃទី ២៩ ខែកញ្ញា ឆ្នាំ២០២៦​ លោក ស៊ូ សុជាតិ បានគូសបញ្ជាក់ថា នេះគឺជាសញ្ញាវិជ្ជមានសម្រាប់ឆ្នាំ២០២៦​ ខណៈកន្លងមក និយ័តករមូលបត្រកម្ពុជា រួមជាមួយអគ្គស្នងការនគរបាលជាតិ និងធនាគារជាតិនៃកម្ពុជា ធ្លាប់បានចេញសេចក្តីថ្លែងការណ៍រួមមួយដើម្បីហាមឃាត់ប្រតិបត្តិការពាក់ព័ន្ធនឹងទ្រព្យឌីជីថល។

យ៉ាងណាមិញ ថ្មីៗនេះ ន.ម.ក បានចេញសេចក្តីថ្លែងការណ៍រួមគ្នា ជាមួយធនាគារជាតិនៃកម្ពុជាម្តងទៀត ប៉ុន្តែក្នុងគោលបំណងគ្រប់គ្រងជាជាងការហាមឃាត់។ ការផ្លាស់ប្តូរនេះបង្ហាញថា អ្វីដែលពីមុនមិនទាន់មានបទប្បញ្ញត្តិ ឥឡូវនេះកំពុងត្រូវបានរៀបចំឡើង។

លោក ស៊ូ សុជាតិ បានលើកឡើងថា«និយ័តករមូលបត្រកម្ពុជាមានប្រកាសពាក់ព័ន្ធដែលបានចេញនៅចុងឆ្នាំ២០២៥ ខណៈប្រកាសផ្សេងទៀតបានចេញតាំងពីចុងឆ្នាំ២០២៤។ នេះជាសញ្ញាល្អមួយដែលប្រកាសប្រាប់ថា បើចង់ធ្វើប្រតិបត្តិការក្នុងវិស័យនេះ គឺមិនមែនជាការហាមឃាត់ទៀតទេ តែត្រូវអនុវត្តតាមច្បាប់»៕