(ភ្នំពេញ)៖ លោក ស៊ូ សុជាតិ ​ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃនិយ័តករមូលបត្រកម្ពុជា (ន.ម.ក.) បានលើកឡើងពី ការហក់ឡើងជិត ៤លានដុល្លារ នៃការជួញដូរមូលបត្រក្នុង១ថ្ងៃ ដែលតួលេខនេះបានក្លាយជាប្រវត្តិសាស្រ្ដដំបូងបំផុត ក្នុងរយៈពេល១០ឆ្នាំនេះ។

ការលើកឡើងរបស់លោក ស៊ូ សុជាតិ ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ការដោះស្រាយបញ្ហាប្រឈម លើ ការពង្រឹងប្រភពទុនរបស់​សហគ្រាស នៅកម្ពុជា»។

លោក ស៊ូ សុជាតិ បានថ្លែងឲ្យដឹងថា វិស័យមូលបត្របានដំណើរការដល់របត់មួយ ដែលមានសន្ទុះនៃការចូលរួមច្រើន ជាក់ស្ដែងនៅថ្ងៃទី១៧ ខែកញ្ញា ឆ្នាំ២០២៦នេះ ផ្សារមូលបត្របានបិទទំហំជួញដូរមួយ ដែលហក់ឡើងប្រមាណ ៤លានដុល្លារក្នុងមួយថ្ងៃ នេះជាលើកទីមួយ ដែលមានទំហំតួលេខប្រមាណ ៤លានដុល្លារប្រចាំថ្ងៃ ក្នុងរយៈពេលជាង ១០ឆ្នាំនៃការប​ង្កើតទីផ្សារមូលបត្រ។

លោកបានបន្ដថា ការចាប់អារម្មណ៍របស់អ្នកជួញដូរ ក្នុងទីផ្សារបន្ទាប់ ឬក៏ការជួញដូរលើវេទិកាជួញដូរ គឺបញ្ជាក់ពីទំនុកចិត្តច្រើនៗ លើវិស័យមូលបត្រ ដើម្បីបានទំហំ ៤លានដុល្លារក្នុងមួយថ្ងៃនេះ មានអ្នកជួញដូរប្រមាណ ៣ពាន់នាក់ក្នុងមួយថ្ងៃ ខណៈដែលដំបូងឡើយវិស័យមូលបត្រ មានអ្នកជួញដូរមិនដល់ ៥០នាក់ផងក្នុងមួយថ្ងៃ៕

សូមស្តាប់ការលើកឡើងរបស់លោក ស៊ូ សុជាតិ៖