(ភ្នំពេញ)៖ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ​នៅថ្ងៃទី១៦ ខែមេសា ឆ្នាំ២០២៦នេះ បានចេញសេចក្តីប្រកាសព័ត៌មានរួម ដោយធ្វើការច្រានចោលទាំងស្រុងចំពោះការផ្សព្វផ្សាយ និងចែករំលែកព័ត៌មានមិនពិត និងគ្មានប្រភពច្បាស់លាស់នាពេលថ្មីៗនេះ តាមរយៈផេកហ្វេសប៊ុកមួយចំនួន ទាក់ទងនឹងការបង្កកសាច់ប្រាក់របស់គ្រឹះស្ថានធនាគារមួយចំនួន ដោយសហរដ្ឋអាម៉េរិក។

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ចាត់ទុកខ្លឹមសារប្រឌិតបែបនេះ គឺបង្កឱ្យមានការភ័ន្តច្រឡំ មិនមានការទទួលខុសត្រូវ បង្កចលាចល និងមានចេតនាបង្កអស្ថិរភាព និងបំផ្លាញទំនុកចិត្តសាធារណជនមកលើប្រព័ន្ធធនាគារ និងហិរញ្ញវត្ថុនៅកម្ពុជា។

សមាគមទាំងពីរ ក៏សូមគាំទ្រចំពោះសេចក្តីប្រកាសព័ត៌មាន របស់ធនាគារជាតិនៃកម្ពុជានាពេលថ្មីៗនេះ ដែលបានបំភ្លឺជាផ្លូវការលើបញ្ហានេះ។ ការឆ្លើយតបទាន់ពេលវេលារបស់ធនាគារជាតិនៃកម្ពុជា គឺមានសារៈសំខាន់ក្នុងការជួយទប់ស្កាត់ព័ត៌មានមិនពិត ទប់ស្កាត់ការភ័ន្តច្រឡំ និងរក្សាទំនុកចិត្តរបស់សាធារណជនមកលើប្រព័ន្ធហិរញ្ញវត្ថុ។

សមាគមទាំងពីរ ក៏សូមគាំទ្រដល់ធនាគារជាតិនៃកម្ពុជា និងអាជ្ញាធរមានសមត្ថកិច្ច ធ្វើការស្រាវជ្រាវ និងកំណត់អត្តសញ្ញាណបុគ្គល ដែលបានផ្សព្វផ្សាយខ្លឹមសារខាងលើឱ្យមកទទួលទោសតាមច្បាប់។

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បញ្ជាក់ថា ការបង្កើត ឬផ្សព្វផ្សាយព័ត៌មានមិនពិតដោយចេតនាទាក់ទងនឹងគ្រឹះស្ថានហិរញ្ញវត្ថុដែលមានអាជ្ញាបណ្ណណាមួយគឺជាបញ្ហាធ្ងន់ធ្ងរបំផុត។ ទង្វើបែបនេះអាចបង្កឱ្យមានចលាចលក្នុងចំណោមអតិថិជន បន្ទុចបង្អាក់ដល់ស្ថានភាពទីផ្សារដែលដំណើរការជាប្រក្រតី និងប៉ះពាល់អវិជ្ជមានដល់ទំនុកចិត្តនៅក្នុងវិស័យហិរញ្ញវត្ថុទាំង
មូល។

ជាមួយគ្នានេះ សមាគមទាំងពីរ ជំរុញឱ្យសាធារណជន សូមមេត្តាកុំពឹងផ្អែកលើពាក្យចចាមអារ៉ាម រូបភាពក្លែងក្លាយ ឬមាតិកាក្នុងប្រព័ន្ធសង្គមដែលមិនមានប្រភពច្បាស់លាស់ និងសូមតាមដានព័ត៌មានផ្លូវការ ដែលចេញដោយធនាគារជាតិនៃកម្ពុជា និងគ្រឹះស្ថានដែលមានអាជ្ញាបណ្ណពាក់ព័ន្ធប៉ុណ្ណោះ។

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា អះអាងថា ខ្លួននឹងធ្វើការយ៉ាងជិតស្និទ្ធជាមួយធនាគារជាតិនៃកម្ពុជា និងគ្រឹះស្ថានសមាជិក ដើម្បីគាំទ្រដល់ទំនាក់ទំនងច្បាស់លាស់ និងរក្សាទំនុកចិត្តពីសាធារណជនលើប្រព័ន្ធធនាគារ និងហិរញ្ញវត្ថុរបស់ប្រទេសកម្ពុជា៕