ការធ្វើពាណិជ្ជកម្មរវាងកម្ពុជា-ថៃ មានទឹកប្រាក់ជាង ៣.៦ពាន់លានដុល្លារ ធ្លាក់ចុះជិត១៥% ក្នុងឆ្នាំ២០២៥ ខណៈការនាំចូលពីថៃធ្លាក់ចុះ ១៥% (Video inside)
12-01-2026 16:20
(ភ្នំពេញ)៖ ក្នុងឆ្នាំ២០២៥ ការធ្វើពាណិជ្ជកម្មរវាងកម្ពុជា-ថៃ មានទំហំជាង ៣.៦ពាន់លានដុល្លារ ធ្លាក់ចុះ ១៤.៨៦% ដែលធ្វើឱ្យថៃនៅតែជាដៃគូពាណិជ្ជកម្មធំជាងគេទី៤ របស់កម្ពុជា បន្ទាប់ពីប្រទេសចិន អាមេរិក និងវៀតណាម។
យោងតាមទិន្នន័យដែលទទួលបានពីក្រសួងពាណិជ្ជកម្ម បានបង្ហាញថា បើទោះបីជា ភាគីទាំងពីរមានជម្លោះជាមួយគ្នា ចាប់តាំងពីពាក់កណ្តាលឆ្នាំ២០២៥មក ហើយពលរដ្ឋខ្មែរចាប់ផ្តើមពហិការឈប់ប្រើប្រាស់ទំនិញថៃក៏ដោយ ប៉ុន្តែការធ្វើពាណិជ្ជកម្មរវាងប្រទេសទាំងពីរនៅតែសកម្ម។
តួយ៉ាងក្នុងឆ្នាំ២០២៥ ការនាំចេញនាំចូលទំនិញរវាងកម្ពុជា-ថៃ មានទឹកប្រាក់សរុបជាង ៣.៦ពាន់លានដុល្លារ ធ្លាក់ចុះ ១៤.៨៦% បើធៀបឆ្នាំ ២០២៤ ដែលមានតម្លៃ ជាង៤.២ពាន់លានដុល្លារ។ ក្នុងនោះថៃនាំចូលទំនិញមកកម្ពុជាមានតម្លៃ ២.៩ពាន់លានដុល្លារ ថយចុះ ១៥.០៤% ស្របពេលកម្ពុជានាំចេញទៅថៃវិញ មានតម្លៃជាង ៧៣២លានដុល្លារ ថយចុះ ១៤.១៥%។
ឧកញ៉ាបណ្ឌិត ស៊ិន ចន្ធី អគ្គនាយកក្រុមហ៊ុនឡាញហល អេចប្រេស ខេមបូឌា និងជាអ្នកជំនាញក្នុងវិស័យភស្តុភារកម្ម និងដឹកជញ្ជូន បានប្រាប់បណ្តាញព័ត៌មាន Fresh News នៅថ្ងៃទី១២ ខែមករា ឆ្នាំ២០២៥នេះថា បើទោះបីជាប្រទេសកម្ពុជា និងថៃ មានជម្លោះជាមួយគ្នាក៏ដោយ ប៉ុន្តែនាំចេញនាំចូលរវាងប្រទេសទាំងពីរនៅតែមានដំណើរ តែយ៉ាងណាស្របពេលពលរដ្ឋកម្ពុជានាំគ្នាពហិការឈប់ប្រើប្រាស់ទំនិញថៃ ការនាំចូលមុខទំនិញមួយចំនួន ដូចជា ភេសជ្ជៈ អាហារកែច្នៃមួយចំនួន ប្រេងឥន្ធនៈ បន្លែ ផ្លែឈើ មិនត្រូវបាននាំចូលទៀតឡើយ។
បើយោងតាមតួលេខ បើទោះបីជាពលរដ្ឋកម្ពុជានាំគ្នា ពហិការឈប់ប្រើប្រាស់ទំនិញថៃ ក៏ប៉ុន្តែទិន្នន័យនៃការធ្វើពាណិជ្ជរវាងប្រទេសទាំងពីរធ្លាក់ចុះតិចតួចប៉ុណ្ណោះ។ ជុំវិញករណីនេះ ឧកញ៉ាបណ្ឌិត ស៊ិន ចន្ធី បានឱ្យដឹងថា ការពហិការឈប់ប្រើប្រាស់ទំនិញថៃភាគច្រើន គឺជាទំនិញដែលប្រើប្រាស់ចុងក្រោយ ឬទំនិញសម្រេច ដូចជាប្រេងឥន្ធនៈ បន្លែផ្លែឈើ ភេសជ្ជៈ និងគ្រឿងបរិភោគផ្សេង។ ប៉ុន្តែសម្រាប់ទំនិញ សម្ភារ និងវត្ថុធាតុដើមដែលប្រើប្រាស់ចាំបាច់សម្រាប់បម្រើដល់ឧស្សាហកម្ម ផលិតកម្ម ដូចជា គ្រឿងបង្គុំ គ្រឿងបន្លាស់ គ្រឿងដំឡើង គ្រឿងសម្រាប់ជួសជុល វត្ថុធាតុដើមសម្រាប់ឧស្សាហកម្ម នៅតែមានការនាំចូលតាមផ្លូវទឹក បន្ទាប់ពីប្រទេសពីរបានបិទព្រំដែនគោក។
លោកបានបញ្ជាក់ថា «ការដោះដូរទំនិញរវាងកម្ពុជា និងថៃ នៅតែមានដំណើរការ ដោយមានការនាំចេញនាំចូលនូវសម្ភារ និងវត្ថុដែលចាំបាច់មួយចំនួន សម្រាប់បម្រើដល់ឧស្សាហកម្ម បម្រើដល់ការជួសជុល និងគ្រឿងបន្លាស់ជាច្រើន ដែលបម្រើដល់ផលិតកម្ម។ ដូច្នេះហើយដំណើរការដឹកជញ្ជូនក៏មិនបានឈប់ឈរដែរ ដោយបង្វែរមកដឹកជញ្ជូនតាមផ្លូវទឹក»៕
