(ភ្នំពេញ)៖ លោក Anthony Gill នាយកស្តីទីធនាគារអភិវឌ្ឍន៍អាស៊ី ហៅកាត់ ADB ប្រចាំប្រទេសកម្ពុជា បានលើកឡើងពីវិស័យសំខាន់ៗ ដែលជំរុញការអភិវឌ្ឍប្រទេសកម្ពុជា ក្រោយជំងឺរាតត្បាតកូវីដ១៩ ដែលត្រូវបាននាំមុខដោយវិស័យកម្មន្តសាល។

ការលើកឡើងបែបនេះ ធ្វើឡើងក្នុងឱកាសដែល លោក Anthony Gill អញ្ជើញចូលរួម ក្នុងកិច្ចពិភាក្សាលើប្រធានបទ៖ «មូលដ្ឋាន​ជំរុញ​កំណើន​សេដ្ឋកិច្ច​កម្ពុជា» ក្នុងកម្មវិធី FRESH BUSINESS។

លោក Anthony Gill បានបញ្ជាក់យ៉ាងដូច្នេះថា «ក្រោយជំងឺរាតត្បាតកូវីដ១៩ កំណើនសេដ្ឋកិច្ចកម្ពុជា ត្រូវបាននាំមុខដោយវិស័យកម្មន្តសាល ដោយមានការគាំទ្រ ដោយការងើបឡើងវិញជាបន្តបន្ទាប់ នៃវិស័យទេសចរណ៍»។

លោក Anthony Gill បានលើកឡើងថា ចាប់តាំងពីវិបត្តិកូវីដ-១៩មក ផលិតកម្មវិស័យកាត់ដេរតែមួយ បានរួមចំណែកប្រហែលមួយភាគបី នៃកំណើន ទាំងមូលរបស់កម្ពុជា។ កំណើនដ៏ខ្លាំងនៃផលិតកម្មកាត់ដេរ គឺជាសក្ខីភាពមួយ ដែលបង្ហាញភាពប្រសើរឡើងរបស់កម្ពុជា ក្នុងការបើកទូលាយពាណិជ្ជកម្ម គោលនយោបាយ FDI និងឡូជីស្ទិចធុរកិច្ច។

* វិស័យសំខាន់ៗផ្សេងទៀត ដែលរួមចំណែកដល់កំណើនសេដ្ឋកិច្ចដែរ រួមមាន៖ ផលិតកម្មក្រៅពីវិស័យកាត់ដេរ (ដូចជាផលិតកម្មគ្រឿងសង្ហារឹម កៅស៊ូ និងឧបករណ៍អេឡិចត្រូនិកជាដើម)។ ទាំងនេះឆ្លុះបញ្ចាំងពីពិពិធកម្មសេដ្ឋកិច្ច។
* វិស័យសេវាកម្ម បានផ្តល់ការជំរុញខ្លះដែរ ដែលនាំមុខដោយការងើបឡើងវិញ នៃសកម្មភាពផ្សេងៗ ទាក់ទងនឹងវិស័យទេសចរណ៍ ក្រោយជំងឺរាតត្បាត ខណៈដែលវិស័យកសិកម្ម បានរួមចំណែកតិចតួចដល់កំណើន ក្នុងរយៈពេល៤ឆ្នាំចុងក្រោយនេះ។

បន្ថែមពីនោះទៀត នាយកស្តីទី ADB ប្រចាំកម្ពុជា បានលើកឡើងទៀតថា ដើម្បីសម្រេចបានកំណើនសេដ្ឋកិច្ច ប្រកបដោយនិរន្តរភាពបន្ថែមទៀត វានឹងតម្រូវឱ្យមានការរួមចំណែកខ្លាំងពីវិស័យក្រៅពីឧស្សាហកម្មទាំងនេះ។

ទន្ទឹមគ្នានេះ លោក Anthony Gill បានបញ្ជាក់ថា ADB កំពុងជួយរដ្ឋាភិបាល ក្នុងកិច្ចខិតខំប្រឹងប្រែងរបស់ខ្លួន ក្នុងការស្តារវិស័យកសិកម្មរបស់កម្ពុជា តាមរយៈការវិនិយោគ លើទំនើបកម្មការងារកសិកម្ម និងការគ្រប់គ្រងធនធាន៕

ខាងក្រោមនេះ ជាវីដេអូនៃការលើកឡើងទាំងស្រុង របស់លោក Anthony Gill៖